ខេត្តសៀមរាប ៖ អាជ្ញាធរអប្សរា គ្រោងជួសជុលប្រាសាទកណ្តាលស្រះស្រង់ នៅឆ្នាំក្រោយ ដើម្បីចូលរួមការពារ និងឱ្យរួចផុតពីហានីភ័យ ទុកជាកេរ្ត៍តំណែល សម្រាប់កូនចៅជំនាន់ក្រោយ ។
តាមលោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឱ្យដឹងថា
យើងត្រូវចូលរួមទាំងអស់គ្នា ដើម្បីការពារថែរក្សាមរតកដូនតារបស់យើង ។
លោកបន្ដថា គម្រោងជួសជុលប្រាសាទកណ្តាលស្រះស្រង់ គឺជាសមិទ្ធិផលទី២ បន្ទាប់ពីរហាត់ទឹក ដែលជាអំណោយដ៏ថ្លៃថ្លារបស់ លោកជំទាវ សៀង ចាន់ហេង ដែលបានរួមចំណែកក្នុងការជួសជុល បេតិកភណ្ឌជាមួយអាជ្ញាធរជាតិអប្សរា រីឯដំណើរការជួសជុល គ្រោងនឹងចាប់ផ្តើមឡើងនៅរដូវប្រាំង ព្រោះទឹករីង ងាយស្រួលក្នុងការធ្វើកំណាយស្រាវជ្រាវ និងជួសជុល ។
គួរជម្រាបថា ប្រាសាទកណ្តាលស្រះស្រង់ កសាងឡើងក្នុងរាជ្យព្រះបាទជ័យវរ្ម័នទី៧ សតវត្សទី១២ ជាតំណាងឱ្យភ្នំព្រះសុមេរុ ។ ប្រាសាទនេះបានរងការបាក់បែកជាខ្លាំង ដោយសារកត្តាធម្មជាតិ ហើយដើម្បីលើកតម្លៃប្រវត្តិសាស្ត្រ សំណង់ប្រាសាទ និងទេសភាពវប្បធម៌ នៃស្រះស្រង់ឡើងវិញនោះ អាជ្ញាធរជាតិអប្សរា និងវិស័យឯកជនបានរួមដៃគ្នាជួសជុលប្រាសាទនេះឡើងវិញ ។
បច្ចុប្បន្ន អាជ្ញាធរជាតិអប្សរា ធ្វើការសិក្សាលម្អិតទាក់ទងនឹងប្រាសាទ រួមទាំងផ្នែកបុរាណវិទ្យា ហើយឆ្លងយោបល់ ក្នុងកិច្ចប្រជុំអាយស៊ីស៊ី-អង្គរ ដែលនឹងប្រព្រឹត្តិទៅនា ខែធ្នូខាងមុខនេះ ទើបដំណើរការជួសជុលបាន ៕
