រាជធានីភ្នំពេញ ៖ នៅវេលាម៉ោង៥ និង៣០នាទីព្រឹកថ្ងៃទី២៦កញ្ញានេះ រថយន្តក្រុង (City Bus) ចំនួន១២០គ្រឿង របស់សាលារាជធានីភ្នំពេញ បានចាប់ផ្តើមដឹកជញ្ជូនអ្នកដំណើរ ដោយឥតគិតថ្លៃ ចេញដំណើរពីភ្នំពេញ ទៅតាមបណ្តាខេត្តនានា ព្រមទាំងមកពីតាមបណ្តាខេត្តនានា ចូលមកភ្នំពេញវិញ ផងដែរទៅតាមចំណតដែលបានកំណត់ទុក ។
ជាការគិតគូរយ៉ាងយកចិត្តទុកដាក់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជូនបងបងប្អូនប្រជាពលរដ្ឋ នាឱកាសបុណ្យភ្ជុំបិណ្ឌប្រពៃណីជាតិ ដោយមិនបង់ប្រាក់រយៈពេល៥ថ្ងៃ ចាប់ពីថ្ងៃទី២៦ ដល់៣០ ខែកញ្ញា ឆ្នាំ២០១៩ ទៅ-មក រាជធានីភ្នំពេញ និងតាមបណ្តាខេត្តនានា ។
ដើម្បីផ្តល់ជូននូវភាពងាយស្រួលដល់បងប្អូនប្រជាពលរដ្ឋ ក្នុងការជិះរថយន្តក្រុងនោះ មានដូចខាងក្រោម ៖
-ទីតាំងចំណត សម្រាប់ឡើងជិះរថយន្តក្រុង ធ្វើដំណើរតាមផ្លូវជាតិលេខ១ និងលេខ២ អ្នកធ្វើដំណើរ នៅភ្នំពេញ អាចឡើងរថយន្តនៅផ្លូវ៦០ម៉ែត្រ ។
-ទីតាំងចំណត សម្រាប់ឡើងជិះរថយន្តក្រុង ធ្វើដំណើរតាមផ្លូវជាតិលេខ៣ និងលេខ៤ អ្នកធ្វើដំណើរ នៅភ្នំពេញ អាចឡើងរថយន្តនៅស្ថានីយ ចំណតរថយន្តផ្លូវ ២០០៤ ជាប់របងបញ្ជាការដ្ឋានកងទ័ពអាកាស ។
-ទីតាំងចំណត សម្រាប់ឡើងជិះរថយន្តក្រុង ធ្វើដំណើរតាមផ្លូវជាតិលេខ៥ អ្នកធ្វើដំណើរ នៅភ្នំពេញអាចឡើងរថយន្តនៅសួនឫស្សីកែវ ។
-ទីតាំងចំណត សម្រាប់ឡើងជិះរថយន្តក្រុង ធ្វើដំណើរតាមផ្លូវជាតិលេខ៦ អ្នកធ្វើដំណើរ នៅភ្នំពេញអាចឡើងរថយន្តក្រុងនៅរង្វង់មូលទេពមច្ឆា ជ្រោយចង្វារ ។
-ចំណែកឯ ទីតាំងចំណត សម្រាប់ឡើងជិះរថយន្តក្រុង ធ្វើដំណើរតាមផ្លូវជាតិលេខ៦ លេខ៧ និងលេខ៦ លេខ៨ ដែលទៅខេត្តកំពង់ចាម ត្បូងឃ្មុំ ក្រចេះ ស្ទឹងត្រែង អាចឡើងឡាន នៅរ៉ារទេះភ្លើង ជិតសាលារាជធានីភ្នំពេញ ៕
