ខេត្តព្រះសីហនុ ៖ រថយន្តធុនធំដឹកថ្ម១គ្រឿងបានបើកបរបោះពួយយ៉ាងលឿនដូចហោះ ហើយខ្វះការប្រុងប្រយ័ត្ន ជ្រុលទៅបុករថយន្តតាក់ស៊ី១គ្រឿងយ៉ាងពេញទំហឹង បណ្តាលឲ្យក្រឡាប់បះជើងច្រងាងៗ និងបណ្តាលឲ្យមនុស្សចំនួន៧នាក់ រងរបួសធ្ងន់ស្រាល ដេកឲ្យរដូករណែលនៅកន្លែងកើតហេតុ។
ករណីគ្រោះថ្នាក់ចរាចរណ៍ ដ៏រន្ធត់នេះ បានកើងឡើង កាលពីវេលាម៉ោង១៦ និង០៥នាទី ថ្ងៃទី២២ ខែកញ្ញា ឆ្នាំ២០១៩ លើផ្លូវជាតិលេខ៤ ចន្លោះគីឡូម៉ែត្រ ១៥៣-១៥៤ ស្ថិតនៅភូមិស្ទឹងឆាយត្បូង ឃុំស្ទឹងឆាយ ស្រុកកំពង់សិលា ។
សមត្ថកិច្ច បានឱ្យដឹងថា ករណីខាងលើបង្កឡើងដោយដោយរថយន្តធុនធំដឹកថ្ម ម៉ាក HYUNDAI ពណ៌ខ្លាញ់ក្តាម ពាក់ស្លាកលេខ ព្រះសីហនុ 3A-8169 អ្នកបើកបរ មិនស្គាល់អត្តសញ្ញាណ មានទិសដៅពីខេត្តព្រះសីហនុ ឆ្ពោះទៅ ភ្នំពេញ លុះដល់ចំណុចខាងលើបានបុកនិងរថយន្ត១គ្រឿងម៉ាក TITAN ពណ៌ស-ក្រហម ពាក់ស្លាកលេខ ព្រះសីហនុ 2A-4804 រថយន្តតាក់ស៊ី ទិសដៅផ្ទុយគ្នា។
ប្រភពបន្តថា គ្រោះថ្នាក់នោះបណ្តាលឲ្យរងរបួសចំនួន៧នាក់ (រងរបួសធ្ងន់ចំនួន៤នាក់ ស្រីម្នាក់ ក្មេង២នាក់ រងរបួសស្រាល៣នាក់ ស្រី២នាក់) បានបញ្ជូនទៅសង្គ្រោះនៅមន្ទីរពេទ្យបង្អែកស្រុកស្រែអំបិល។
បច្ចុប្បន្នកម្លាំងជំនាញកំពុងចាត់ចែងស្ទូចយកវត្ថុតាងចេញពីកន្លែងកើតហេតុ ដើម្បីយកទៅរក្សាទុកនៅអធិការដ្ឋាននគរបាលស្រុកកំពង់សិលា ដើម្បីរង់ចាំធ្វើការដោះស្រាយតាមផ្លូវច្បាប់ ៕