ភ្នំពេញ ៖ នៅសាលាដំបូងរាជធានីភ្នំពេញ កាលពីរសៀលថ្ងៃទី១៧ ខែកញ្ញា ឆ្នាំ២០១៩ លោកចៅក្រមស៊ើបសួរ សេង រិទ្ធី បានសម្រេចឃុំខ្លួនសមាជិកក្រុមប្រឹក្សានីតិកម្មនៃក្រសួងមហាផ្ទៃម្នាក់ ដាក់ពន្ធនាគារព្រៃស ជាបណ្តោះអាសន្ន ពាក់ព័ន្ធសំណុំរឿងឆបោក ប្រាក់២ម៉ឺនដុល្លារ ក្នុងការរត់ការចូលក្របខណ្ឌនគរបាលជាតិ ប្រព្រឹត្តកាលពីអំឡុងឆ្នាំ២០១៧ ។
ជនជាប់ចោទឈ្មោះ ហុក គីមសាយ អាយុ៥០ឆ្នាំមានតួនាទីជាសមាជិកក្រុមប្រឹក្សានីតិកម្ម នៃក្រសួងមហាផ្ទៃស្នាក់នៅផ្ទះលេខ ២៧ ផ្លូវ ៣៩០ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ត្រូវបានកម្លាំងសមត្ថកិច្ចការិយាល័យព្រហ្មទណ្ឌកងរាជអាវុធហត្ថរាជធានីភ្នំពេញ ឃាត់ខ្លួនតាមដីការបស់តុលាការសាលាដំបូងរាជធានីភ្នំពេញ ។
សូមរម្លឹកថា កាលពីអំឡុងឆ្នាំ២០១៧ ជនសង្ស័យបានឆបោកលុយបុរសម្នាក់ឈ្មោះ ម៉ែន ច័ន្ទវាសនា ចំនួន២ម៉ឺនដុល្លារ ដោយសន្យាថា នឹងជួយរត់ការឲ្យបានចូលបម្រើការងារក្នុងក្របខ័ណ្ឌនគរបាលជាតិ ប៉ុន្តែក្រោយពីទទួលបានលុយពីជនរងគ្រោះ ជនសង្ស័យមិនបានបំពេញកាតព្វកិច្ចរបស់ខ្លួនតាមកិច្ចសន្យានោះទេ មិនតែប៉ុណ្ណោះជននេះ បានព្យាយាមបិទទូរស័ព្ទ គេចវេះពីការទទួលខុសត្រូវ ។ ជនជាប់ចោទ រត់ការមិនបានសម្រេច និងមិនព្រមប្រគល់លុយឲ្យជនរងគ្រោះវិញនោះទេ ទើបជនរងគ្រោះដាក់ពាក្យប្ដឹងទៅតុលាការរាជធានីភ្នំពេញដោយចោទប្រកាន់ពីបទឆបោក ។
នៅក្នុងសវនាការ ជនជាប់ចោទឈ្មោះ ហុក គីមសាយ បានសារភាពថា គាត់បានប្រព្រឹត្តអំពើនោះដូចការចោទប្រកាន់ ពិតប្រាកដមែន! ប៉ុន្តែប្រាក់ទាំងនោះ រូបគាត់ទទួលបានតែ ៣,០០០ដុល្លារប៉ុណ្ណោះ ចំណែកប្រាក់នៅសល់ពីនោះចំនួន ១៧,០០០ ដុល្លារទៀត គាត់បានប្រគល់ទៅឲ្យកូនលោកធំម្នាក់ទៀត ជួយរត់ការបន្ត ។
ពាក់ព័ន្ធនឹងករណីនេះ មហាជនរងចាំមើលថា តើក្រុមសមត្ថកិច្ចនឹងបន្តធ្វើការស្រាវជ្រាវបន្ថែមទៀត ដើម្បីវែកមុខរកជនពាក់ព័ន្ធ នាំយកមកផ្ដន្ទាទោសតាមនីតិវិធីច្បាប់ ដែរទេ ?