ភ្នំពេញ៖ រុស្ស៊ីដែលជាប្រទេសធំជាងនៅគេលើពិភពលោកនោះ បានទទួលសំណើក្នុងការជួយជំរុញការតភ្ជាប់ជើងហោះហើរត្រង់មកកម្ពុជា និងសហការជាមួយកម្ពុជាក្នុងការផ្សព្វផ្សាយ ពីគោលដៅទេសចរណ៍កម្ពុជាទៅកាន់ទីផ្សារក្នុងប្រទេសរបស់ខ្លួន សំដៅរុញកំណើនទេសចររុស្ស៊ី និងទេសចរមកពីប្រទេសទីបីមកទស្សនាកម្ពុជាកាន់តែច្រើន។ នេះបើយោងតាមហ្វេសប៊ុករបស់ក្រសួងទេសចរណ៍។
![](https://1.bp.blogspot.com/-ECtgW0Zz_yc/XYM88bMzfMI/AAAAAAAAOHs/nhQaDSX9fek9Y7gQK2CXXWUAWN9O5m4qwCLcBGAsYHQ/s1600/photo_2019-09-19_14-34-52.jpg)
ការបញ្ជាក់យ៉ាងដូច្នេះត្រូវបានធ្វើឡើងក្នុងជំនួបពិភាក្សារវាងលោក ថោង ខុន រដ្ឋមន្ត្រីក្រសួងទេសចរណ៍ ជាមួយប្រតិភូស្ថានទូតរុស្ស៊ីប្រចាំកម្ពុជា ដឹកនាំដោយលោក ឌីមីទ្រី ស្វឺតខូវ (Dmitry Tsvetkov) ឯកអគ្គរដ្ឋទូតរុស្ស៊ីប្រចាំកម្ពុជានាថ្ងៃទី១៩ ខែកញ្ញា ឆ្នាំ២០១៩។
![](https://1.bp.blogspot.com/-4lqamhV5ez4/XYM88My-yhI/AAAAAAAAOHo/vGgo1KJddbEB4X6aiUbtN7vNC1E32XDjgCLcBGAsYHQ/s1600/photo_2019-09-19_14-35-02.jpg)
បច្ចុប្បន្នកម្ពុជាមិនទាន់មានការហោះហើរត្រង់ទៅកាន់រដ្ឋធានីមូស្គូ ឬទីក្រុងណាមួយនៅចុងបូព៌ាមកកាន់កម្ពុជានៅឡើយទេ ដូច្នេះហើយបានជាលោករដ្ឋមន្ត្រី ថោង ខុន ស្នើទៅកាន់លោកឯកអគ្គរដ្ឋទូតរុស្ស៊ី ធ្វើយ៉ាងណាជំរុញការតភ្ជាប់ជើងហោះហើរត្រង់ពីទីក្រុង វ្ល៉ាឌីវ៉ូស្តុក(Vladivostok) ឬពីទីក្រុងណាមួយរបស់រុស្សីមកកាន់កម្ពុជា ដែលមានរយៈចម្ងាយខ្លីជាងមកពីមូស្គូ ដើម្បីជំរុញកំណើនទេសចររុស្ស៊ី មកកម្ពុជា។
![](https://1.bp.blogspot.com/-KMFjH8wzrc0/XYM88WDPBmI/AAAAAAAAOHw/-jM33F5GeZgSR69I79UKLqHGGrLDxzlkwCLcBGAsYHQ/s1600/photo_2019-09-19_14-52-18.jpg)
ជាការឆ្លើយតប ទូតរុស្ស៊ីបានទទួលយកសំណើទាំងនេះយ៉ាងពេញចិត្ត ប៉ុន្តែក៏បានស្នើមកកម្ពុជាវិញដែរ ដោយសហការជាមួយរុស្ស៊ីឲ្យបានជិតស្និទ្ធដើម្បីឲ្យកិច្ចសហប្រតិបត្តិការនេះ ដំណើរការទៅប្រកបដោយផ្លែផ្កា។
ជាមួយគ្នានោះ លោករដ្ឋមន្ត្រី ថោង ខុន បានស្នើភាគីរុស្ស៊ីរៀបចំដំណើរទស្សនកិច្ចកសិទេសចរណ៍ (Farm Trip) នៅកម្ពុជា សម្រាប់ប្រតិភូ និងអ្នកសារព័ត៌មានមកពី រុស្ស៊ីឲ្យបាន២ដងក្នុងមួយឆ្នាំ ដើម្បីបង្កើនការផ្សព្វផ្សាយពីវិស័យទេសចរណ៍ និងគោលដៅទេសចរណ៍របស់កម្ពុជា ទៅកាន់ទីផ្សារទេសចរណ៍រុស្ស៊ីឲ្យបានច្រើនឡើង និងស្នើភាគី រុស្ស៊ីជួយសហការរៀបចំ ព្រឹត្តិការណ៍ទេសចរណ៍ ដំណើរកម្សាន្តផ្សេងៗនៅកម្ពុជាឱ្យបានញឹកញាប់ផងដែរ។
![](https://1.bp.blogspot.com/-pNLjZi5P82w/XYM89hX_gpI/AAAAAAAAOH0/8yj5nHhgEToA3gT34ssLU0OTS9d7nzsXQCLcBGAsYHQ/s1600/photo_2019-09-19_14-52-27.jpg)
សូមជម្រាបថា នៅឆ្នាំ២០១៨ កន្លងទៅ កម្ពុជាទទួលបានទេសចររុស្ស៊ីប្រមាណជិត ៦៥,០០០នាក់ និងនៅរយៈពេល៧ខែ ឆ្នាំ២០១៩នេះ ទេសចររុស្ស៊ីបានមកទស្សនា កម្ពុជា៣៤,០០០នាក់។ ក្នុងចំណោមតំបន់អាស៊ាន ប្រទេសថៃ វៀតណាម ឥណ្ឌូនេស៊ី (ពិសេសកោះបាលី) ជាប្រទេសទទួលបានទេសចររុស្ស៊ីច្រើនជាងគេ ។ កម្ពុជាសង្ឃឹមថានឹងទទួលបានទេសចររុស្ស៊ីបន្ថែមទៀត តាមរយៈការតភ្ជាប់ជើងហោះហើរត្រង់មកខេត្តសៀមរាប និងតំបន់ឆ្នេរ ក៏ដូចជារាជធានីភ្នំពេញ ៕