មន្ត្រីជំនាញគយនិងរដ្ឋាករខេត្តក្រចេះ សហការជាមួយកម្លាំងកងរាជអាវុធហត្ថក្រុង ដឹកនាំសម្របសម្រួលដោយលោកជា សុភ័ក្ត្រ ព្រះរាជអាជ្ញារងអមសាលាដំបូងខេត្តក្រចេះ បានចុះឆែកឆេរ ហាងនិងឃ្លាំងលក់ម៉ូតូចំនួន២កន្លែង រកឃើញម៉ូតូអត់ពន្ធជាង៣០គ្រឿង ។
ប្រតិបត្តិការចុះឆែកឆេរឃ្លាំងម៉ូតូទាំង២កន្លែងខាងលើនេះធ្វើឡើងនៅរសៀលថ្ងៃទី៧ ខែកញ្ញា ឆ្នាំ២០១៩ ដែលមានឃ្លាំង ឈ្មោះយីហោ (រិនដា) និងឃ្លាំងទី២-ឈ្មោះ(យីហោ) យង់ ស៊ាងហោ ដែលមានទីតាំងនៅក្បែរធនាគារអេស៊ីលីដា ស្ថិតនៅក្នុងសង្កាត់ក្រចេះ ក្រុងក្រចេះ ។
លោក ចាន់ សំបូរ ប្រធានសាខាគយនិងរដ្ឋាករខេត្តក្រចេះ បានឲ្យដឹងថា កម្លាំងបានឆែកឆេរឃ្លាំងចំនួន២ គឺត្រូវបានមន្ត្រីជំនាញរកឃើញម៉ូតូអត់ពន្ធចំនួន៣៣គ្រឿង និងបានរឹបអូសយកទៅរក្សាទុក នៅស្នាក់ការគយ និងរដ្ឋាករខេត្តក្រចេះ ដើម្បីពិនិត្យផ្ទៀងផ្ទាត់ឯកសារ ។
លោក បញ្ជាក់ថា ជាទូទៅ នេះគឺជាបទល្មើសគយ ដោយមន្ត្រីលោករកឃើញថា ម៉ូតូទាំង៣៣គ្រឿងមិនទាន់បានបំពេញកាតព្វកិច្ចពន្ធទេ មន្ត្រីជំនាញរឹបអូសយកទៅរក្សាទុកសិន ដើម្បីរង់ចាំឲ្យគាត់ទៅបំពេញឯកសារពន្ធគយ បង់ពន្ធ និងផាកពិន័យតាមច្បាប់ ដែលបានកំណត់រួច និងប្រគល់ឲ្យគាត់យកគេដាក់តាំងលក់ជាធម្មតាវិញ កាលណាគាត់បានបំពេញកាតព្វកិច្ចបង់ពន្ធគយហើយ ៕