រាជធានីភ្នំពេញ ៖ ស្ត្រីម្នាក់មានប្ដីទៅហើយ ខណៈប្ដីទៅស្រុកបែរជានាំប្រុស សេ្នហ៍ចូលដេកសោយសុខដល់ក្នុងបន្ទប់ជួល លុះឪពុកមាខាងប្រពន្ធ ទូរស័ព្ទប្រាប់ប្ដី ទើបតាមទាន់ប្តឹងសមត្ថកិច្ចឃាត់យក មកសួរនាំធ្វើឲ្យមានការភ្ញាក់ផ្អើលកាលវេលាម៉ោង៧ និង៣០នាទីថ្ងៃទី៥ ខែកញ្ញា ឆ្នាំ ២០១៩ នៅផ្ទះជួល ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
បុរសជាប្ដី មានឈ្មោះ អន សឿន អាយុ២០ឆ្នាំ មុខរបរកម្មករោងចក្រ ស្នាក់នៅភូមិអង្គ សង្កាត់ចោមចៅ៣ខណ្ឌ ពោធិ៍សែនជ័យ រាជធានី ភ្នំពេញ តែបានត្រលប់ទៅស្រុកមួយរយៈ នៅខេត្តស្វាយរៀង ។ ចំណែកស្ដ្រីជាប្រពន្ធ មានឈ្មោះ ទិត សុផាត អាយុ២១ឆ្នាំ មុខរបរជាកម្មករ រោងចក្រ ស្នាក់នៅបន្ទប់ជួលកើតហេតុខាងលើ មានស្រុកកំណើតនៅភូមិមុខដា ស្រុករមាសហែក ខេត្តស្វាយរៀង ។
ចំណែកប្រុសកំពូលស្នេហ៍ ជាសហាយនោះ មានឈ្មោះ ស៊ង វ៉ាន់ឆៃ អាយុ២២ឆ្នាំ មុរបរកម្មកររោងចក្រ ស្នាក់នៅផ្ទះជួលជាមួយស្ត្រីផិតប្ដីខាងលើ ស្រុកកំណើតមិនត្រូវបានស្គាល់ ។
តាមប្រភពពីប្ដី បានឲ្យដឹងថា មុនពេលកើតហេតុរូបគេទាំង២នាក់ខាងលើ មិនបានរស់នៅបន្ទប់ជួលជាមួយនោះទេ ដោយខ្លួនទៅនៅស្រុកមួយរយៈ ស្រាប់តែទទួលដំណឹងពីឪពុកមាខាងប្រពន្ធប្រាប់ថា ប្រពន្ធខ្លួនកំពុងលួចមានសាហាយហើយ និងនាំយកមកនៅក្នុងបន្ទប់ជួលថ្មីជាមួយគ្នាថែមទៀត ។ ឮដូច្នោះបុរសជាប្ដីក៏ប្រញាប់ប្រញ៉ាលមកពីស្រុកឡើងមកភ្នំពេញ ដើម្បីមកបន្ទប់ជួលមើលប្រពន្ធរបស់ខ្លួន ពិតជាអ៊ីចឹងមែនអត់ ? ។
បុរសជាប្តីប្រាប់បន្តថា លុះនៅថ្ងៃទី៥ កញ្ញានេះ មុនពេលកើតហេតុ រូបគាត់បានមកពីស្រុកកំណើត ដើម្បីតាមដានប្រពន្ធក៏ឃើញប្រពន្ធនាំសហាយចូលក្នុងបន្ទប់ជួលនោះពិតប្រាកដមែន រូបគាត់ក៏យកកូនសោ ទៅចាក់ពីខាងក្រៅបន្ទប់ ហើយបានទៅប្តឹងនគរបាលប៉ុស្តិ៍ចោមចៅ៣ភ្លាមៗផងដែរ ដើម្បីជួយអន្តរាគមន៍ ឃាត់ស្ត្រីជាប្រពន្ធ និងប្រុសស្នេហ៍ទៅប៉ុស្តិ៍ដើម្បីសួរនាំ ។
បុរសជាប្តី បាននិយាយរៀបរាប់ប្រាប់ថា គាត់បានចូលស្តីដណ្តឹងនារីជាប្រពន្ធ តាមប្រពៃណីរៀបការពេញច្បាប់ ដោយមានចាស់ទុំ សមផ្គុំគ្នា តាំងពីខែកុម្ភៈ ឆ្នាំ ២០១៩ មកម្ល៉េះ ហើយបង្គាប់ថ្លៃបណ្ដាការចំនួន១ពាន់៥រយដុល្លារ ។
ខណៈពេលសមត្ថកិច្ចសាកសួរស្ត្រី ជាប្រពន្ធនាងបានសារភាពថា ខ្លួនមានទំនាក់ទំនងជាមួយប្រុសសហាយអស់រយៈពេល១ខែមកហើយ តែ មិនទាន់បានស៊ីជំរៅនៅឡើយ ចំណែកឯបុរសជាប្រុសស្នេហ៍បានសារភាពដូចនារីជាប្រពន្ធដែរថា រូបគេទើបតែទាក់ទងគ្នាទេ គឺរូបគេតែមកចូលបន្ទប់ជួលនេះបានម្តងតែប៉ុណ្ណោះ ។
ក្រោយពេលកើតហេតុ បុរសជាប្តីមិនប្តឹងផ្តល់ទៅលើប្រពន្ធនោះទេ គ្រាន់តែអោយសមត្ថកិច្ចធ្វើការអប់រំនាង និងបុរសសំណព្វចិត្ត តែ ប៉ុណ្ណោះ នឹងអោយស្ត្រីជាប្រពន្ធរបស់ខ្លួនត្រលប់ទៅស្រុកកំណើតវិញ ដើម្បីផ្តិតមេដាយលែងលះគ្នាតាមផ្លូវច្បាប់ ដោយទុកឲ្យរូបនាង និងប្រុសសាហាយ បន្តសោយសុខបន្តទៀត រូបគេសុំដកខ្លួនចេញ ៕
