ខេត្តព្រះសីហនុ ៖ គិតត្រឹមម៉ោងជាង១២ថ្ងៃត្រង់ ថ្ងៃទី០៤ ខែកញ្ញា ឆ្នាំ២០១៩ នេះស្ថានភាពកម្ពស់ទឹកនៅចំណុចស្ពានស្ទឹងសំរោង ចន្លោះគីឡូម៉ែត្រលេខ១១៥-១១៦ ផ្លូវជាតិលេខ៤ ក្នុងភូមិសាស្ត្រ ភូមិស្ទឹងសំរោង ឃុំអូរបាក់រទេះ ស្រុកកំពង់សីលា កំពុងបន្តហក់ឡើងដល់កម្ពស់ ៥.៦៥ម៉ែត្រ ពីបាតស្ទឹង ក្នុងនោះទឹកបានហូរកាត់លើផ្លូវជាតិជាបណ្តើរៗហើយ ស្របពេលដែលធាតុអាកាសធាតុមេឃកំពុងភ្លៀងធ្លាក់តិច ច្រើនជាបន្តដែរ ។
ប្រសិនស្ថានភាពនេះ អាជ្ញាធរបានធ្វើការសន្និដ្ឋានថា បើភ្លៀងនៅតែបន្តធ្លាក់ នារសៀលថ្ងៃនេះ កម្ពស់ទឹកអាចនឹងឡើងដល់កំរិតប្រកាសអាសន្នហើយគឺកម្ពស់ ៥.៨០ម៉ែត្រ ។
ទោះជាយ៉ាងនេះក្តី ចរាចរណ៍តាមផ្លូវជាតិលេខ៤ ត្រង់ចំណុចស្ពានស្ទឹងសំរោង នៅបើកដំណើរការទៅមកធម្មតា ដោយកម្លាំងគណៈបញ្ជាការឯកភាពរដ្ឋបាលស្រុកកំពង់សីលា ដឹកនាំដោយលោក សៅ បុរីវឌ្ឍនៈ អភិបាលស្រុក បានដាក់កម្លាំងប្រចាំការសម្រួលចរាចរណ៍ ផងដែរ ៕