រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី៣០ ខែសីហា ឆ្នាំ២០១៩នេះ បានចេញបទបញ្ជាឱ្យបញ្ឈប់អាជីវកម្មល្បែងភ្នាល់ តាមរយៈអ៉ិនធើណេតអនឡាញ ឱ្យអស់ត្រឹមដំណាច់ឆ្នាំ២០១៩ នេះបើយោងតាមសេចក្តីប្រកាសព័ត៌មាន របស់គណៈរដ្ឋមន្ត្រី ។
សម្ដេចតេជោ បានគូសញ្ជាក់ថា ប្រទេសកម្ពុជាត្រូវអភិវឌ្ឍសេដ្ឋកិច្ច ដោយឈរលើមូលដ្ឋាន នៃសេវាទេសចរណ៍វប្បធម៌ និងធម្មជាតិ ជាជាងការពឹងផ្អែកលើចំណូល ពីអាជីវកម្មល្បែងភ្នាល់អនឡាញ ។
កាលពីថ្ងៃទី១៨ ខែសីហា ឆ្នាំ២០១៩ សម្តេចតេជោ ហ៊ុន សែន បានចេញសារាចរណែនាំមួយ ដោយបញ្ឈប់ការ ផ្តល់គោលការណ៍ និងអាជ្ញាប័ណ្ណអនុញ្ញាតឲ្យប្រកបអាជីវកម្ម ល្បែងភ្នាល់តាមម៉ាស៉ីនអេឡិចត្រូនិចអនឡាយ ( Internet Online) ទាំងក្នុងនិងក្រៅប្រទេស ។
ក្រុមឧក្រិដ្ឋជនបរទេសមួយចំនួនបានប្រើប្រាស់ល្បែងនេះ ដើម្បីបោកប្រាស់ជំរិតទារប្រាក់ពីជនរងគ្រោះទាំងក្នុង និងក្រៅប្រទេស ហើយវិធានការហាមឃាត់ធ្វើអាជីវកម្មល្បែងភ្នាល់តាមអ៊ីនធើណេតអនឡាញ ឬប្រព័ន្ធអ៊ីនធឺណិត របស់រាជរដ្ឋាភិបាលកម្ពុជានេះ ត្រូវបានគេមើលឃើញថា មិនត្រឹមតែបានជួយកែលម្អសន្តិសុខនៅកម្ពុជា ប្រកបដោយភាពវិជ្ជមានប៉ុណ្ណោះទេ ប៉ុន្តែជាការគ្រប់គ្រងជនអន្តោរប្រវេសន៍មួយប្រកបដោយប្រសិទ្ធភាព ដោយមិនមានការចាប់បង្ខំ ។
ជនជាតិចិន ពិសេសចិននៅកំពង់សោម បានសំរុកចាកចេញពីកម្ពុជា ក្នុងរយៈពេលប៉ុន្មានថ្ងៃនេះ បានកើតឡើង បើតាមរបាយការណ៍របស់អាជ្ញាធរកម្ពុជា បានឲ្យដឹងនៅថ្ងៃទី៣១ ខែសីហាថា ត្រឹមតែ១យប់ប៉ុណ្ណោះ ជនជាតិចិនរហូតដល់ ៣,០០០នាក់ បានចាកចេញពីខេត្តព្រះសីហនុ តាមជើងហោះហើរ ត្រឡប់ទៅកាន់ប្រទេសពួកគេវិញ បន្ទាប់ពីមានការរឹតបន្តឹងលើល្បែងអនឡាញ ។
ដោយឡែកឯកសារសរសេរដោយដៃ ដែលគេបង្ហោះចែកចាយ នៅថ្ងៃទី០២ ខែកញ្ញា ឆ្នាំ២០១៩ បង្ហាញថា ជនជាតិចិន បានចេញពីកម្ពុជា គិតចាប់ពីថ្ងៃទី២៥ ខែសីហា រហូតដល់ថ្ងៃទី៣១ ខែសីហា ឆ្នាំ២០១៩ មានចំនួន ៨៨,៥៨៥ នាក់ ។ ឯកសារដដែល ក៏បានបង្ហាញពីចំនួនជនជាតិចិន ចូលទឹកដីកម្ពុជា ចាប់ពីថ្ងៃទី២៥ ដល់ថ្ងៃទី៣១ ខែសីហា ឆ្នាំ២០១៩ គឺមានចំនួន ៤៧,៥៩៦ នាក់ ៕
