រាជធានីភ្នំពេញ ៖ ក្រសួងសុខាភិបាល ចេញសេចក្តីដំណឹង ផ្សាយលើទំព័រហ្វេសប៊ុករបស់ខ្លួន អោយដល់សាធារណជនទាំងអស់ជ្រាបថា ឈប់ជឿលើការផ្សព្វផ្សាយកុហក់បោកប្រាស់តាមបណ្តាញសង្គម របស់គណនីហ្វេសប៊ុកចំនួន៥ និងឈប់ប្រើប្រាស់ឱសថ បំប៉នផ្លូវភេទបុរសឈ្មោះ WOW MAN គ្មានបញ្ជិកានេះតទៅទៀត ។
គណនីហ្វេសប៊ុកទាំង៥ គឺ៖ ទី១ ភាពខ្លាំងនៃបុរស, ទី២ បងខ្លាំងអស្ចារ្យ, ទី៣ ខ្លាំងដូចដើម, ទី៤ Wow Man Online, និងទី៥ Super Storm Thai កំពុងផ្សព្វផ្សាយលក់ឱសថបំប៉នផ្លូវភេទបុរសឈ្មោះ WOW MAN គ្មានបញ្ជិកា និងគ្មានច្បាប់ពីក្រសួងសុខាភិបាលឡើយ ព្រមទាំងផ្សព្វផ្សាយភូតកុហក់បោកប្រាស់ បំភ្លើសហួសពីការពិត គ្មានមូលដ្ឋានវិទ្យាស្ត្រត្រឹមត្រូវ ដូចជាថា ឱសថព្យាបាលជំងឺលើសឈាម ជំងឺទឹកនោមផ្អែម ទឹកនោមប្រៃ ជំងឺសន្លាក់ បញ្ហាស្ត្រេស និងធ្វើឱ្យរាងកាយមាំមួនអារម្មណ៍ស្រស់ស្រាយ ។
សេចក្តីប្រកាសដដែលនេះ ក្រសួងសុខាភិបាលបានប្រកាសបញ្ជាឱ្យម្ចាស់គណនីហ្វេសប៊ុកទាំង៥ បញ្ឈប់ជាបន្ទាន់នូវការប្រកាសផ្សព្វផ្សាយលក់ ឬ ចែកចាយ ឱសថបំប៉នផ្លូវភេទបុរសឈ្មោះ WOW MAN ។ ហើយថា ក្រសួងនឹងមានវិធានការចំពោះម្ចាស់គណនី ហ្វេសប៊ុកទាំង៥ ខាងលើ នេះ តាមច្បាប់ជាធរមាន ។ ក្នុងករណីបានឃើញអ្នកប្រើប្រាស់ លក់ ឬ ចែកចាយឱសថបំប៉នផ្លូវភេទបុរសឈ្មោះ WOW MAN គ្មានបញ្ជិកា នេះសូមផ្តល់ព័ត៌មាន ឬ ត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បិរក្ខាពេទ្យ និង គ្រឿងសម្អាង តាមរយៈទូរស័ព្ទលេខ ០៩៥ ៣៥៩ ៣៩៩ ឬ ០១២ ៩៨៣ ៣៣៤ ៕