ខេត្តព្រះវិហារ ៖ នៅរសៀលថ្ងៃទី២៣ ខែសីហា ២០១៩នេះ មន្ត្រីក្រសួងការពារជាតិ បានអះអាងថា ស្ថានភាពកងទ័ពខ្មែរ និងឡាវ ដែលកំពុងឈរជើងនៅចំណុចទន្លេរពៅ ក្នុងតំបន់មុំបី ស្ថិតស្រុកឆែប ខេត្តព្រះវិហារ ពុំទាន់មានអ្វីវិវឌ្ឍន៍ធ្ងន់ធ្ងរនៅឡើយទេ ។
ឧត្តមសេនីយ៍ទោ ម៉ៅ ផល្លា នាយរងសេនាធិការ នាយការិយាល័យទី៥ និងជាអ្នកនាំពាក្យកងទ័ពជើងគោក បានប្រាប់វិទ្យុជាតិកម្ពុជា អោយដឹងថា កងទ័ពកម្ពុជា និងកងទ័ពឡាវ នៅចំនុចទន្លេរពៅ គឺនៅរក្សាភាពនឹងនររៀងៗខ្លួន ហើយពុំមាន សកម្មភាពប្រឈមមុខដាក់គ្នា ដូចការផ្សព្វផ្សាយរបស់ប្រព័ន្ធផ្សព្វផ្សាយក្នុងស្រុកមួយចំនួនឡើយ ។
ឧត្តមសេនីយ៍ទោ ម៉ៅ ផល្លា បញ្ជាក់ថា មកដល់ពេលនេះ ទាំងខាងកម្ពុជា និងខាងឡាវ នៅរក្សាលំនឹង ហើយទុកអោយថ្នាក់លើ ជាអ្នកចរចាដោយសន្តិវិធី ។
លោកឧត្តមសេនីយ៍ទោ ម៉ៅ ផល្លា ថ្លែងយ៉ាងដូច្នេះថា ៖ អត់ទាន់មានអីថ្មីទេ.. យើងនៅធម្មតា កងទ័ពទាំង២ នៅរក្សាភាពស្ងៀមស្ងាត់ យើងបាន ជួបគ្នាពិភាក្សាគ្នា ខាងគេមានកម្លាំងតិចតួចទេ… មិនមានអ្វីធ្ងន់ធ្ងរទេ គឺកម្លាំងតូចតាច ។
សូមរម្លឹកថា កងទ័ពឡាវ បានលើកគ្នាចូលមកកាន់កាប់ទឹកដីខ្មែរ ក្នុងចំណុចទន្លេរពៅនេះ តាំងពីថ្ងៃទី១៤ ខែសីហាមកម្ល៉េះ ដោយភាគីឡាវ សំអាងថា នេះជាទឹកដីរបស់គេ ។ យ៉ាងណាក៏ដោយ ភាគីកម្ពុជាមានជំហរដាច់ខាតមិនអនុញ្ញាតឲ្យទ័ពឡាវ ធ្វើបែបនេះឡើយ ហើយព្យាយាម បញ្ចៀសការប៉ះទង្គិចទាំងសងខាង តែយើងរង់ចាំមើលសភាពការណ៍ជាក់ស្ដែងបន្តទៀត ៕
