ខេត្តសៀមរាប ៖ ឧបទ្ទវហេតុផ្ទុះហ្គាសដ៏រន្ធត់មួយ បានកើតឡើងកាលពីរសៀលថ្ងៃទី១៤ ខែសីហា ឆ្នាំ២០១៩ នៅកន្លែងបញ្ចូលហ្គាសរថយន្ត LPG ស្ថិតនៅតាមបណ្តោយផ្លូវលោកតាណឺយ មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប បង្កឲ្យមានការភ្ញាក់ផ្អើលយ៉ាងខ្លាំង ។
យោងតាមប្រភពព័ត៌មានចុងក្រោយ បានឲ្យដឹងថា គិតត្រឹមម៉ោង១០និង៣០នាទីថ្ងៃទី១៥ សីហា នេះ ជនរងគ្រោះសរុបមានចំនួនទាំង១៣នាក់ក្នុងនោះមានស្ត្រី២នាក់ជាជនបរទេសផងដែរ និងមិនមាននរណាម្នាក់ស្លាប់បាត់បង់ជីវិតនោះទេ ។ បច្ចុប្បន្ន ជនរងគ្រោះទាំង១៣នាក់ កំពុងត្រូវបានជួយសង្គ្រោះ និងមើលថែទាំពីសំណាក់ក្រុមគ្រូពេទ្យ យ៉ាងយកចិត្តទុកដាក់ផងដែរ ។
ក្រោយការផ្ទុះនៅស្ថានីយ៍បញ្ជូលឧស្ម័នឥន្ធនៈ LPG ផ្អើលក្រុងសៀមរាប ក្រសួងរ៉ែ និងថាមពល បានចេញសេចក្តីប្រកាសព័ត៌មាននៅថ្ងៃទី១៥ សីហា ឆ្នាំ២០១៩នេះថា ក្រសួងបានពិនិត្យឃើញថា ស្ថានីយ៍នេះ គឺពុំមានច្បាប់អនុញ្ញាតត្រឹមត្រូវពីក្រសួង និងអាជ្ញាធរមូលដ្ឋានក្នុងតំបន់ ក្នុងការកសាង និងធ្វើអាជីវកម្មបញ្ជូលឧស្ម័ននេះទេ បច្ចុប្បន្នក្រសួងបាននឹងបន្តនិតិវិធីស្រាវជ្រាវលើករណីនេះបន្ថែមទៀត ។
ក្រសួងរ៉ែ និងថាមពល ក៏សូមណែនាំដល់សាធារណៈជន មេត្តាជ្រាបថា ការបើកអាជីវកម្មដំណើរការស្ថានីយ៍ប្រេង ជាពិសេសឧស្ម័នឥន្ធនៈ LPG ត្រូវតែមានវិជ្ជាជីវៈ និងបច្ចេកទេសសុវត្ថិភាពឲ្យបានត្រឹមត្រូវ ហើយតម្រូវឲ្យមានច្បាប់អានុញ្ញាត ពីក្រសួងជំនាញនិងស្ថាប័នពាក់ព័ន្ធ ជៀសវាងការបង្កឲ្យមានហានិភ័យ និងគ្រោះថ្នាក់ដល់ខ្លួនឯង និងអ្នកដទៃ ។
ជាមួយគ្នានេះក៏មានមតិមហាជនលើកឡើងថា បើគ្មានច្បាប់អនុញ្ញាត ចុះហេតុអីបានជាបណ្តោយអោយ អាជីវកម្មនេះដំណើរការបាន រហូតដល់ផ្ទុះ? ៕
