រាជធានីភ្នំពេញ ៖ នៅព្រឹកថ្ងៃទី១៥ សីហា ២០១៩នេះ នាយកដ្ឋានប្រឆាំងបទល្មើសបច្ចេកវិទ្យា នឹងបញ្ជួនជនសង្ស័យម្នាក់ ឈ្មោះ នួន វ៉ា ភេទប្រុស អាយុ៣២ឆ្នាំ ទៅតុលាការ ក្រោយសកម្មភាពប្រើប្រាស់បច្ចេកវិទ្យាបោកប្រាស់អ្នកដទៃ ។
ជនសង្ស័យឈ្មោះ នួន វ៉ា ត្រូវបាននាយកដ្ឋានប្រឆាំងបទល្មើសបច្ចេកវិទ្យា រួមសហការជាមួយអធិការដ្ឋាននគរបាលខណ្ឌសែនសុខ ក្រោមការសម្របសម្រួលពីព្រះរាជរងអមសាលាដំបូងរាជធានីភ្នំពេញកាលពីថ្ងៃទី១៣ សីហា បានឃាត់ខ្លួនត្រង់ចំណុចផ្លូវឌួងងៀប៣ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនសង្ស័យ រូបនេះ បានបង្កើតគណនីក្លែងក្លាយ ឆបោកជំរិតទារប្រាក់អ្នកដទៃ និងបង្កើត ហ្វេសប៊ុក ដោយប្រើរូបលោក ចៅ ប៊ុនហួន មេធាវីស្ម័គ្រចិត្តតេជោសែន ដើម្បីបោកប្រាស់អ្នកដទៃ និងគំរាមកំហែងយកផលប្រយោជន៍ផ្ទាល់ខ្លួន និងធ្វើឲ្យប៉ះពាល់ដល់កិត្តិយសរបស់ថ្នាក់ដឹកនាំ ។ ក្នុងនោះបានឆាតទៅឆបោកប្រាក់គណនីហ្វេសប៊ុកឈ្មោះ Chumteav kolsokhom Tevi ដែលជាអ្នកមានស្តុកស្តម្ភមួយរូបផងដែរ ។
ជនសង្ស័យបានសារភាពនូវទោសកំហុសដែលខ្លួនបានប្រព្រឹត្ត និងនាយកដ្ឋានប្រឆាំងបទល្មើសបច្ចេកវិទ្យា នឹងបញ្ជូនទៅតុលាការនៅថ្ងៃទី១៥ សីហានេះ ។
ឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានថ្លែងថា នាពេលកន្លងទៅ ជនសង្ស័យខាងលើនេះបានលួចរូបថត លោកមេធាវី ចៅ ប៊ុនហួន មេធាវីស្ម័គ្រចិត្ត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី យកទៅបង្កើតគណនី ហ្វេសប៊ុក ដើម្បីបោកប្រាស់អ្នកដទៃរហូតដល់មានគណនីហ្វេសប៊ុក ឈ្មោះ Chumteav Kolsokhom Tevi បានបង្ហោះរូបលោកមេធាវី និងសារមួយចំនួនទម្លាក់កំហុស មកលើលោកមេធាវី ដោយមិនដឹងមូលហេតុថែមទៀត ។ លុះនានៅព្រឹកថ្ងៃទី០៦ ខែសីហា ឆ្នាំ ២០១៩ លោកមេធាវី ប៊ុន ហួន ក៏បានទៅដាក់ពាក្យបណ្តឹង ដើម្បីស្រាវជ្រាវរកជនបង្ក នៅនាយកដ្ឋានប្រឆ្នាំង បទល្មើសបច្ចេកវិទ្យា នៃក្រសួងមហាផ្ទៃ ដើម្បីឱ្យជួយស្រាវជ្រាវតែម្តង ៕