ព្រះសីហនុ ៖ កាលពីថ្ងៃម្សិលមិញ សត្វក្រពើ២ក្បាល បានធ្វើឲ្យប្រជាពលរដ្ឋក្នុងក្រុងព្រះសីហនុ មានការភ័យខ្លាច ខណៈកំពុងរងនូវជំនន់ទឹកភ្លៀងប៉ុន្មានថ្ងៃចុងក្រោយនេះ តាមពិតគឺជាក្រពើ ដែលសាលាឡាយហ្វ៍ ចិញ្ចឹមទុក ជាការសិក្សា អំពីរបៀបថែទាំ និងអោយចំណីសត្វក្រពើ នេះបើតាមសេចក្តីរាយការណ៍ពីអ្នកយកព័ត៌មានប្រចាំខេត្តព្រះសីហនុ ។
សេចក្តីរាយការណ៍បន្ថែម តំណាងសាលាបញ្ជាក់ថា កូនក្រពើដែលពលរដ្ឋប្រទះឃើញនេះ ដោយសារសំណាញ់រក្សាកន្លែងចិញ្ចឹមរហែក ពេលមានជំនន់ទឹកភ្លៀង ទើបរត់រួច ក្នុងទ្រុងចិញ្ចឹមកូនក្រពើនៅសាលាឡាយហ្វ៍ មានកូនក្រពើសរុបចំនួន១៧ក្បាល និងបញ្ជាក់ផងដែរថា មិនមែនចិញ្ចឹមបែបអាជីវកម្មទេ គឺចិញ្ចឹមជាលក្ខណៈសម្រាប់ការសិក្សា។
តំណាងសាលាបន្តថា មានតែ២ក្បាលនេះប៉ុណ្ណោះ ដែលចេញរួចពីកន្លែងចិញ្ចឹម ហើយបច្ចុប្បន្នខាងសាលាបានទំនាក់ទំនងនាំយកមកវិញអស់ហើយ ។
ជាមួយគ្នានេះ និងសាលាឡាយហ្វ៍បានធ្វើការសុំទោសបងប្អូនប្រជាពលរដ្ឋក្នុងក្រុងព្រះសីហនុ ដែលភ្ញាក់ផ្អើល និងភ័យព្រួយ ក្រោយចាប់បានកូនក្រពើតូចៗនេះ ។
សូមរម្លឹកថា អ្នកក្រុងព្រះសីហនុ ជូនដំណឹងមកថា នៅសេតេ ក្នុងក្រុម១ ភូមិ១ សង្កាត់៣ ក្នុងក្រុងព្រះសីហនុ មានសត្វក្រពើ២ក្បាល(មិនដឹងថា ជាក្រពើមានអ្នកចិញ្ចឹមទេ) បានឡើងតាមទឹកអូរមកលើដីភូមិ រួចត្រូវបានប្រជាពលរដ្ឋចាប់យករក្សាទុកជាបណ្តោះអាសន្ន ។
កាលល្ងាចថ្ងៃ១១ សីហា ២០១៩ ប្រជាពលរដ្ឋដែលបានចាប់ក្រពើនេះទុក ឲ្យដឹងថា ក្រពើមួយក្បាលមានទម្ងន់ប្រហែលជាង៥គីឡូក្រាម និងមួយក្បាលទៀតមានទម្ងន់២គីឡូក្រាម ហើយដំណឹងនេះ ជ្រាបដល់មន្ត្រីជំនាញចុះមកពិនិត្យ ៕
