ស្វាយរៀង ៖ នៅព្រឹកថ្ងៃទី១២ ខែសីហា ឆ្នាំ២០១៩នេះ អភិបាលខេត្តស្វាយរៀងលោក ម៉ែន វិបុល បានថ្លែងទៅកាន់មន្ត្រីរាជការគ្រប់ស្រុក-ក្រុង ដែលបានចូលរួមផ្សព្វផ្សាយបញ្ជ្រាបដល់ពលរដ្ឋនៅមូលដ្ឋានរបស់ខ្លួន និងអំពាវនាវឲ្យពួកគាត់បរិភោគសាច់ជ្រូកឡើងវិញ ព្រោះជំងឺបេស្តជ្រូកអាហ្វ្រិក មិនឆ្លងដល់មនុស្សទេ គឺឆ្លងតែសត្វជ្រូកគ្នាវាប៉ុណ្ណោះ ។
ការថ្លែងរបស់អភិបាលខេត្តស្វាយរៀងបែបនេះ នៅក្នុងឱកាសដែលលោកអញ្ជើញបរិភោគសាច់ជ្រូក ដែលរៀបចំឡើងដោយមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀង ក្រោមប្រធានបទ «សាច់ជ្រូកនៅតែមានសុត្ថិភាព ក្នុងការទទួលទាន ដោយពុំបាច់បារម្ភ និងដើម្បីក្តីសង្ឃឹម ដល់អ្នកចិញ្ចឹមជ្រូក និងដើម្បីយើងទាំងអស់គ្នា» ។
លោក ម៉ែន វិបុល បានណែនាំដល់មន្ទីរកសិកម្ម រុក្ខាប្រមាញ់ និងនេសាទ និងមន្ត្រីសមត្ថកិច្ច ដែលពាក់ព័ន្ធទាំងអស់ ត្រូវបន្តចុះពិនិត្យរាល់សាច់ជ្រូក ដែលនាំចូលមកលក់ក្នុងទីផ្សារ ឲ្យបានហ្មត់ចត់ ដោយមិនត្រូវឲ្យមានការនាំចូលជ្រូក ពីក្រៅប្រទេសមកចូល នៅក្នុងទឹកខេត្តស្វាយរៀងនោះទេ ។
សូមជម្រាបថា ចំពោះខេត្តស្វាយរៀង ដែលមានករណីផ្ទុះនៅភូមិឫស្សី ជួរខាងត្បូងឃុំក្រោលគោ ស្រុកស្វាយជ្រំ ឥឡូវបានស្ងប់ស្ងាត់ទៅវិញហើយ ដោយមានការយកចិត្តទុក ពីក្រសួងកសិកម្ម រុក្ខាប្រមាញ់ និងនេសាទ ។ ជំងឺបេស្តជ្រូកអាហ្វ្រិក បានសម្លាប់ជ្រូកចំនួន៩៥ក្បាល នៅឃុំក្រោលគោ ៕
