ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូន បានធ្វើការពន្យល់ អោយដឹងថា បើមានតែរថយន្ត១គ្រឿងគត់ ដឹកលើសទម្ងន់១០តោន នៅលើផ្លូវមួយនោះ វាស្មើនឹងមានរថយន្ត១ម៉ឺនគ្រឿង កំពុងធ្វើចរាចរនៅលើដងផ្លូវ ។
លោក ស៊ុន ចាន់ថុល បានឲ្យដឹងថា ទោះបីផ្លូវល្អ មានគុណភាពរឹងមាំប៉ុនណាក៏ដោយ បើមានរថយន្តដឹកទំនិញ លើសទម្ងន់កម្រិតកំណត់ ផ្លូវនេះនឹងឆាប់ខូច និងមិនអាចប្រើប្រាស់បានយូរឡើយ ។
លោកមានប្រសាសន៍ ដោយលើកយករូបមន្តរបស់ធនាគារពិភពលោកមកបង្ហាញថា បើសិនជាមានរថយន្តមួយគ្រឿងដឹកទំនិញលើសទម្ងន់កម្រិតកំណត់ចំនួន៣០តោន នៅលើផ្លូវមួយ វាស្មើនឹងរថយន្ត ៨១០,០០០គ្រឿង កំពុងធ្វើចរាចរនៅលើផ្លូវនោះ (ដោយ៣០×៣០×៣០×៣០=៨១០,០០០គ្រឿង)” ។
ទោះជាយ៉ាងណាក្ដី រដ្ឋមន្ដ្រីសាធារណការ ផ្ដាំផ្ញើឲ្យមន្ត្រីទាំងអស់ ធ្វើការប្ដេជ្ញាខ្ពស់ជាងនេះទៀត ព្រមទាំងសាមគ្គីសហការគ្នា ឲ្យបានស្អិតរមួត និងអនុវត្តច្បាប់ឲ្យបានម៉ឺងម៉ាត់ ដើម្បីឈានទៅលុបបំបាត់ការ ដឹកជញ្ជូនលើសទម្ងន់កម្រិតកំណត់ ដែលបានកំណត់ក្នុងច្បាប់ និងបទដ្ឋានគតិយុត្តជាធរមានរបស់កម្ពុជា ៕
