រាជធានីភ្នំពេញ ៖ នៅថ្ងៃសុក្រទី១៩ កក្កដា ២០១៩នេះ មន្ត្រីគយកំពុងស៊ើបអង្កេតក្រុមហ៊ុនចិនមួយ ដែលនាំចូលកាកសំណល់ប្លាស្ទិក ប្រមាណជា ១.៦០០ តោនពីសហរដ្ឋអាមេរិក និងកាណាដា ដោយខុសច្បាប់ ចូលប្រទេសកម្ពូជា នេះបើតាមទីភ្នាក់ងារសារព័ត៌មានរ៉យទ័របានចុះផ្សាយ ។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានប្រាប់រ៉យទ័រថា ក្រុមហ៊ុនចិន ដែលមានមូលដ្ឋាននៅកម្ពុជា ជាអ្នកនាំចូលកាកសំណល់សំរាមប្លាស្ទិក ៨៣កុងតឺន័រ ទម្ងន់១៦០០តោន ពីសហរដ្ឋអាមេរិក និងកាដាណា នៅកំពង់ផែស្វយ័តក្រុងព្រះសីហនុ នៅសប្តាហ៍នេះ ។
បើតាមលោក គុណ ញឺម ថាក្រុមហ៊ុនចិននេះមានឈ្មោះថា Chungyuen ។ រដ្ឋាភិបាលនឹងចាត់វិធានការលើក្រុមហ៊ុនដែលនាំចូលសំរាមខាងលើនេះ លោក គុណ ញឹម បញ្ជាក់ថា «យើងនឹងផាកពិន័យ ហើយឈានដល់ការបិទក្រុមហ៊ុននោះ ប្រសិនបើស្រាវជ្រាវរកឃើញថា បានប្រព្រឹត្តបទល្មើសធ្ងន់ធ្ងរ »។
លោក គុណ ញឺម បានបញ្ជាក់ថា កាកសំណល់សំរាមប្លាស្ទិកទាំង៨៣កុងតឺន័រនេះ បានមកដល់កម្ពុជា ចាប់តាំងពីអំឡុងខែតុលា ឆ្នាំ២០១៨ មកម្ល៉េះ ។
ទោះជាយ៉ាងណា ការបញ្ជូនសំរាមត្រឡប់ទៅប្រទេសដើមវិញ លោក គុណ ញឹម មិនទាន់អាចបញ្ជាក់កាលបរិច្ឆេទបាននៅឡើយទេ ដោយត្រូវធ្វើការតាមនីតិវិធីសិន ។ លោកថា «ត្រូវការពេលវេលា និងនីតិវិធីបន្តិច ហើយសប្ដាហ៍ក្រោយនេះ យើងនឹងកោះហៅក្រុមហ៊ុន ដើម្បីជជែកគ្នាពីការបញ្ជូនសំរាមត្រឡប់ទៅវិញ អាចនឹងឆាប់ៗនេះ» ។
ស្ថានទូតសហរដ្ឋអាមេរិក នៅទីក្រុងភ្នំពេញ បាននិយាយថា ខ្លួនបានដឹងអំពីរបាយការណ៍នេះ ។ បើតាមលោកស្រី Emily Zeeberg អ្នកនាំពាក្យរបស់ស្ថានទូតសហរដ្ឋអាមេរិក បានប្រាប់រ៉យទ័រថា “យើងបានស្នើសុំព័ត៌មានបន្ថែម និងកំពុងផ្តល់ទៅរដ្ឋាភិបាលសហរដ្ឋអាមេរិក ដើម្បីកំណត់ទាំងអ្នកនាំចេញ(ប្រទេសនៃប្រភពដើម) និងអង្គភាពនាំចូលប្រទេសកម្ពុជា” ។
ស្ថានទូតកាណាដានៅភ្នំពេញ មិនបានឆ្លើយតបភ្លាមៗទៅនឹងការស្នើសុំពីអ្នកសារព័ត៌មានរ៉យទ័រ ដើម្បីសុំការបំភ្លឺនោះទេ ។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឲ្យដឹងថា ពួកគេក្លែងឈ្មោះទំនិញដោយដាក់ថា “ផលិតផលកែច្នៃ” ។
លោកភក្ត្រា បានមានប្រសាសន៍ថា “រាជរដ្ឋាភិបាលកម្ពុជាមិនអនុញ្ញាតឱ្យនាំចូលកាកសំណល់ប្លាស្ទិក ចូលក្នុងប្រទេសកម្ពុជាទេ។ “កម្ពុជាមិនមែនជាធុងសំរាមទេ” ៕
ប្រភពពី Cambodia probes Chinese firm over illegal waste imports