រាជធានីភ្នំពេញ ៖ ប្រភពព័ត៌មានច្បាស់ការមួយ បានឲ្យដឹងថា នៅរសៀលថ្ងៃទី១៨ ខែកក្កដា ឆ្នាំ២០១៩នេះ សមត្ថកិច្ចនគរបាលព្រហ្មទណ្ឌក្រសួងមហាផ្ទៃ នឹងបញ្ជូនប្រធានក្រុមហ៊ុន អ៊ីណារីតា ឌីវេឡុបម៉ិន ឯ.ក ទៅកាន់សាលាដំបូងរាជធានីភ្នំពេញ ដើម្បីសាកសួរពាក់ព័ន្ធករណីឆបោក ព្រមទាំងករណីចេញសែកស្អុយជាដើម ។
ជនសង្ស័យដែលត្រូវកម្លាំងនគរបាលសន្តិសុខផ្ទៃក្នុង ក្រសួងមហាផ្ទៃ ឃាត់ខ្លួនបញ្ជូនទៅតុលាការនេះ មានឈ្មោះ ឌីម សួនណាត ភេទប្រុស ជាប្រធានក្រុមហ៊ុន អ៊ីណារីតា ឌីវេឡុបម៉ិន ឯ.ក (ENARITA DEVELOPMENT CO.,LTD.) មានទីលំនៅផ្ទះលេខ ៣៤ ផ្លូវលេខ១០០៧ សង្លាត់ភ្នំពេញថ្មី ខណ្ឌសែនសុខ ។
ការចាប់ខ្លួនលោក ឌីម សួនណាត នាពេលនេះ គឺធ្វើឡើងយោងតាមពាក្យបណ្តឹងរបស់ប្រជាពលរដ្ឋជាច្រើននាក់ ដែលចាញ់បោកលោក ឌីម សួនណាត តាមរូបភាព «វិនិយោគបានការប្រាក់ខ្ពស់» ។ ប្រភពព័ត៌មានបានអះអាងថា ទឹកប្រាក់ប្រមាណពី២០០លានដុល្លារ ទៅ៣០០លានដុល្លារ ត្រូវបានលោក ឌីម សួនណាត ឆបោកពីប្រជាពលរដ្ឋជាច្រើននាក់ តាមរូបភាពទិញលក់អចលនវត្ថុ និងតាមរូបភាពដាក់តម្កល់ប្រាក់យកការប្រាក់ (ចងការប្រាក់) ផងដែរ ។ លុះពេលអតិថិជនបណ្ដាក់ទុនទៅមិនមានផលកំរ៉ៃដូចការសន្យា ឈ្មោះ ឌីម សួនណាត ក៏ចេញសែកសងមកអតិថិជនវិញ តាមចំនួនលុយជាក់ស្ដែង ប៉ុន្តែសែកនោះមិនមានលុយ ទើបម្ចាស់លុយជាច្រើននាក់ទឹកភ្នែកជួតក្បាលជង្គង់ ចោមរោមប្ដឹងតែម្ដង ពិសេស ពលករនៅប្រទេសកូរ៉េ ។
លោក ឌីម សួនណាត ដែលអ្នកខ្លះហៅថា លោកឧកញ៉ាៗ ជាអគ្គនាយកក្រុមហ៊ុន Enarita វិនិយោគលើការពុះដីឡូតិ៍លក់នៅតាមទីប្រជុំជន តំបន់ទេសចរណ៍ ក៏ដូចជាតាមបណ្ដាខេត្តមួយចំនួន ហើយថ្មីៗមានឈ្មោះល្បីល្បាញខាងពុះដីឡូតិ៍ ដោយមានលក់បញ្ចុះតំលៃ និងប្រូម៉ូសិនផ្សេងៗជាច្រើន បានរងនូវការចោទប្រកាន់ពីសំណាក់ ដៃគួរដាក់ទុកវិនិយោគជាមួយ ពិសេសពលករនៅប្រទេសកូរ៉េ ថា បានប្រើល្បិច ឆបោកប្រាក់ពួកគេរាប់សិបលានដុល្លារ តាមរយៈដាក់ទុនជាមួយ ក្រុមហ៊ុន និងទទួលបានការ ប្រាក់ខ្ពស់ ចាប់ពី២០ភាគរយក្នុងមួយខែ ចុងក្រោយប្រាក់ក៏បង់ ថង់ក៏ដាច់ ចេញសែកអត់លុយ ផ្ទុះរឿងឡើង ។
បើតាមគេហទំព័រក្នុងស្រុកជាច្រើនបានចុះផ្សាយអោយដឹងនៅថ្ងៃទី១៨ កក្តដានេះថា ពលករនៅប្រទេសកូរ៉េ រាប់រយនាក់ បានចាញ់បោក ក្រុមហ៊ុន Enarita ដែលមានឈ្មោះ លោក ឌីម សួនណាត ជាអគ្គនាយកក្រុមហ៊ុន តាមរយៈការដាក់ទុកវិនិយោគ ជាមួយនិងការប្រាក់ខ្ពស់ គឺដាក់លុយចាប់ពី១ម៉ឺនដុល្លារ និងបានទទួលការប្រាក់ ២០ភាគរយ បើដាក់ចាប់ពី២ ឬ៣ម៉ឺនដុល្លារឡើងទៅ អាចទទួលបានការប្រាក់ពី២៥ ទៅ៣០ភាគរយ និយាយទៅដាក់កាន់តែច្រើន ទទួលបានការប្រាក់កាន់តែឡើង ។
នៅមុនពេលពួកគេដាក់ទុន ក្រុមហ៊ុនតម្រូវឲ្យពលករនៅកូរ៉េ បង្កើតជាក្រុមចាប់ពី១០នាក់ឡើងទៅ ងាយស្រួលប្រមូលលុយ និងដកលុយមកវិញ ។ នៅប្រទេសកូរ៉េ តាមដែលលោកដឹងមានពលករ រាប់រយនាក់ ទៅពាន់នាក់ដែលបានចាញ់បោក ក្រុមហ៊ុន Enarita ។ រឿងឆបោកនោះ អ្នកដាក់ហ៊ុនដំបូង ក្រុមហ៊ុនគេ អោយការប្រាក់ជាធម្មតា ទៅតាមចំនួន នៃការដាក់ និយាយឲ្យចំ គឺប្រមូលអ្នកថ្មីអោយការអ្នកចាស់ ដោយសារតែ អ្នកចាស់បានទទួលប្រាក់ពីក្រុមហ៊ុន ទៅតាមការសន្យានោះហើយ ទើបពួកអ្នកចាស់ៗ បានប្រកូកប្រកាសបន្តគ្នា ហៅឲ្យពលករនាំគ្នាដាក់ជាបន្តបន្ទាប់ ប៉ុន្តែមួយរយៈចុងក្រោយនេះ ពលករលែងមានទំនុកចិត្ត ក៏លែងដាក់លុយ និងនាំគ្នាទាមទារបើកលុយដើមវិញ បែរជាក្រុមហ៊ុនបើកសែកឲ្យម្នាក់ៗមួយសន្លឹក តែសែកនោះគ្មានប្រាក់ឡើយ ទើបផ្ទុះរឿងកើតឡើងតែម្តង ។
លុះដឹងថា ចាញ់បោកលោក ឌីម សួនណាត ប្រជាពលរដ្ឋ និងពលករ ដែលបានដាក់ទុនជាមួយ ផ្ទុះការតវ៉ា ទាមទារប្រាក់ការ និងប្រាក់ដើមឡើងវិញ បានតែសែកស្អុយ គ្មានលុយមួយរៀល ចុងក្រោយ ប្តឹងសមត្ថកិច្ចក្រសួងមហាផ្ទៃឲ្យឃាត់ខ្លួន អគ្គនាយកក្រុមហ៊ុនអចលនាទ្រព្យ ក្រុមហ៊ុន អ៊ីណារីតា កាលពីថ្ងៃទី១៦ ខែកក្កដា ឆ្នាំ២០១៩ ខណៈ ដែលជនរងគ្រោះ ណាត់ហូបបាយជួបគ្នាដោះស្រាយបញ្ហា នៅភោជនីយដ្ឋានមួយកន្លែង ឃាត់ខ្លួនបញ្ជួនទៅ ក្រសួងមហាផ្ទៃ សាកសួរ និងត្រៀមឡើងតុលាការ ស្របពេលមានពាក្យបណ្តឹងរបស់ជនរងគ្រោះជាច្រើននាក់ បានសម្រុកទៅដាក់ពាក្យបណ្តឹង ប្តឹងអគ្គនាយករូបនោះ ជាហូរហែ ។
មហាកំពុងរងចាំមើលថាតើជនរងគ្រោះ អាចនឹងទទួលបានប្រាក់ ដែលបានខាតបង់ពីអំពើឆបោករបស់លោកឧកញ៉ាដែលមានទ្រព្យស្តុកស្តមយ៉ាងឆាប់រហ័សរូបនេះ មកវិញដែរឬទេ ?