ភ្នំពេញ ៖ នារីស្រស់ស្អាតម្នាក់ឈរចាំម៉ូយ ស្រាប់តែត្រូវជនសង្ស័យ២នាក់ជិះរថយន្តមកកាប់ប្លន់ទូរស័ព្ទដៃបានសម្រេច នៅវេលាម៉ោងជាង១យប់រំលងអធ្រាត្រឈានចូលថ្ងៃទី១៦ ខែកក្កដា ឆ្នាំ២០១៩ ស្ថិតតាម បណ្តោយផ្លូវព្រះស៊ីសុវត្ថិ កែងនិងផ្លូវ លេខ៩០ នៅមាត់ទន្លេ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
នារីរងគ្រោះ នៅមិនទាន់ស្គាល់អត្តសញ្ញាណនៅឡើយ ក្រោយកើតហេតុភ្លាមៗ ត្រូវបានដឹកទៅសង្គ្រោះនៅឯពេទ្យព្រះកេតុមាលា (១៧៩) ។
តាមសម្តីសាក្សីម្នាក់ដែលឃើញហេតុការណ៍ ប្រាប់ថា មុនពេលកើតហេតុ រូបគាត់ឃើញ នារីរងគ្រោះកំពុងចុចទូរស័ព្ទ នៅលើសួនមាត់ទន្លេ ទល់មុខអតីតទ្រូហ្វេស ស្រាប់តែមានរថយន្តកូរ៉ឡា ពាក់ផ្លាកលេខ 2034 (មិនចាំអក្សរ) ជិះគ្នា២នាក់ មកឈប់ហើយសួរនារីរងគ្រោះ ។ ពេលទៅដល់ឃើញទូរស័ព្ទម៉ាក OPPO របស់នារីរងគ្រោះ ក៏បានចាប់យកទូរស័ព្ទនោះ តែនាងមិនព្រមឲ្យ ស្រាប់តែជនសង្ស័យដកកាំបិតពីចង្កេះកាប់ទៅលើនារីរងគ្រោះមួយកាំបិតខាងក្រោយ ចំលើត្រគាក បណ្ដាលឲ្យមានឈាមហូរស្រោចខ្លួន ភ្លាមៗនោះជនសង្ស័យទាំង២នាក់បើករថយន្ត គេចតាមផ្លូវព្រះស៊ីសុវត្ថិ ឆ្ពោះទៅផ្លូវ១៣ បាត់ស្រមោល មិនរំខានដល់ដំណេកបងៗសមត្ថកិច្ចឡើយ ៕
