មណ្ឌលគិរី ៖ នៅរសៀលថ្ងៃទី១០ ខែកក្កដា ឆ្នាំ២០១៩ មន្ទីរឧស្សាហកម្ម និងសិប្បកម្មខេត្តមណ្ឌលគិរី សហការជាមួយអាជ្ញាធរក្រុង បានចុះត្រួតពិនិត្យ និងផ្អាកដំណើរការបណ្តោះអាសន្ន សិប្បកម្មផលិតទឹកពិសា ចំនួន២កន្លែង នៅក្នុងក្រុងសែនមនោរម្យ ដែលមិនមានច្បាប់អនុញ្ញាតត្រឹមត្រូវ ។
សូមជម្រាបថា ការចុះត្រួតពិនិត្យសិប្បកម្មផលិតទឹកពិសាដប មន្រ្តីជំនាញរកឃើញថា សិប្បកម្មខាងលើនេះ បានដំណើរការផលិត និងចែកចាយផលិតផលរបស់ខ្លួននៅលើទីផ្សារដោយគ្មានច្បាប់អនុញ្ញាតទេ ។ ម្យ៉ាងទៀត ឧបករណ៍ចម្រោះទឹក ដែលប្រើប្រាស់នោះ គឺអាចប្រើប្រាស់បានត្រឹមលក្ខណៈគ្រួសារតែប៉ុណ្ណោះ ។ ម្យ៉ាងទៀត ទាំងបរិមាណផលិត ទាំងគុណភាពផលិត រួមទាំងលក្ខណៈបច្ចេកទេសក្បួនអនាម័យផលិតកម្ម និងទីតាំងផលិត ខ្សែសង្វាក់ផលិតកម្មច្រកដប និងវេចខ្ចប់របស់សិប្បកម្មទាំងពីរនេះ គឺមិនអនុលោមទៅតាមបទដ្ឋានបច្ចេកទេសទឹកពិសារដបនោះឡើយ ដែលអាចធ្វើឱ្យប៉ះពាល់ដល់គុណភាពទឹក និងប៉ះពាល់សុខភាពអ្នកប្រើប្រាស់នៅលើទីផ្សារ ។
លោក សុខ ប៊ុនធឿន អនុប្រធានមន្ទីរឧស្សាហកម្ម និងសិប្បកម្មខេត្ត បានធ្វើការណែនាំដល់ម្ចាស់សិប្បកម្មខាងលើ ត្រូវមកទំនាក់ទំនងសុំច្បាប់បង្កើតរោងចក្រសិប្បកម្មនៅមន្ទីរឧស្សាហកម្ម និងសិប្បកម្មខេត្ត ដើម្បីកែប្រែនូវប្រព័ន្ធផលិតកម្ម និងគុណភាពឱ្យសមស្របតាមស្តង់ដារបច្ចេកទេសទឹកពិសាដប និងនិតីវិធីផ្លូវច្បាប់ ។
លោក បញ្ជាក់ថា ក្នុងករណីម្ចាស់សិប្បកម្មមិនអនុវត្តន៍តាមការណែនាំរបស់មន្ត្រីជំនាញ ហើយឃើញនៅតែបន្តការផលិត និងចរាចរណ៍ចែកចាយលក់លើទីផ្សារទៀត មន្ទីរនឹងចាត់វិធានការតាមនីតិវិធីច្បាប់ ដោយមានស្ថានប័នជំនាញពាក់ព័ន្ធចូលរួមអនុវត្តច្បាប់ និងផាកពិន័យតាមច្បាប់ជាធរមាន ៕