រាជធានីភ្នំពេញ ៖ ក្រសួងសុខាភិបាល បានស្រាវជ្រាវ និងពិនិត្យឃើញ ក្រុមហ៊ុនឈ្មោះ P.V.B PHARMA គ្មានច្បាប់អនុញ្ញាតពីក្រសួង ហើយកំពុងចែកចាយឱសថចំនួន៣មុខដោយខុសច្បាប់ គឺទី១. Cadinutrivit, ទី២. Vitamin B 1, B 6 , B 12 -HV, និងទី៣. HV CALCI-D បិទលតាបត្រក្លែងក្លាយ ដោយគ្មានលេខបញ្ជិកាត្រឹមត្រូវពីក្រសួងឡើយ ។
បើតាមសេចក្តីប្រកាសរបស់ក្រសួងសុខាភិបាល ដែលបានចេញផ្សាយលើទំព័រហ្វេសប៊ុករបស់ខ្លួន អោយដឹងបន្តថា ភ្នាក់ងារត្រួតពិនិត្យឱសថ ត្រូវសហការជាមួយមន្ទីរសុខាភិបាលរាជធានី ខេត្ត វេជ្ជបណ្ឌិត ឱសថការី ដែលទទួលបន្ទុកបច្ចេកទេស នៃគ្រឹះស្ថានលក់ឱសថ និងអាជ្ញាធរមូលដ្ឋាន ដើម្បីតាមដានស្វែងរកក្រុមហ៊ុនខាងលើ មកផ្តន្ទាទោសទៅតាមច្បាប់ និងប្រមូលឱសថទាំង៣ប្រភេទខាងលើមកកម្ទេចចោល ។
សេចក្តីប្រកាសដដែលនេះ បានបញ្ជាក់ថា ករណីបានឃើញជនណាកំពុងលក់ចែកចាយ ទិញ និងតាំងលក់ឱសថខុសច្បាប់ទាំង៣មុខខាងលើនេះ សូមផ្តល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បិរក្ខាពេទ្យ និងគ្រឿងសម្អាង តាមរយៈទូរស័ព្ទលេខ ០១១ ៥៧៤ ៧៨៧ ឬ ០១២ ៩៨៣ ៣៣៤, ០១២ ៨៩២ ០២២, ០១៧ ៦០៦ ៦៧០, ០១៧ ៨៦៦ ៧៦០ ៕
