អាមេរិក ៖ សហរដ្ឋអាមេរិក បានសម្រេចលក់សព្វាវុធទៅឲ្យកោះតៃវ៉ាន់ ក្នុងទំហំទឹកប្រាក់ជាងពីរពាន់លានដុល្លារ ទាំងជម្លោះពាណិជ្ជកម្មរវាងខ្លួន និងប្រទេសចិននៅមិនទាន់ធូរស្រាល នៅឡើយនោះ ។
សព្វាវុធដែលរដ្ឋបាលរបស់លោកប្រធានាធិបតីដូណាល់ ត្រាំ ទើបតែសម្រេចនេះ រួមមានដូចជា រថក្រោះ M1A2T Abrams ចំនួន១០៨គ្រឿង និងមីស៊ីល Stinger ដែលអាចលីបាញ់លើស្មាបានចំនួន២៥០គ្រាប់ជាដើម ដោយគិតជាទឹកប្រាក់មានទំហំប្រហែល២,២ពាន់លានដុល្លារ ។
លោកស្រី Tsai Ing-wen ប្រធានាធិបតីតៃវ៉ាន់បានលើកឡើងកាលពីខែមីនា ថា សព្វាវុធដែលលោកស្រីស្នើទិញពីសហរដ្ឋអាមេរិក នឹងជួយពង្រឹងសមត្ថភាពរបស់កងទ័ពកោះតៃវ៉ាន់ឲ្យកាន់ខ្លាំងជាងមុន និងបង្ហាញឲ្យពិភពលោកឃើញពីការគាំទ្ររបស់សហរដ្ឋអាមេរិកចំពោះកោះតៃវ៉ាន់តែម្តង។
ទីភ្នាក់ងារសហប្រតិបត្តិការសន្តិសុខជាតិនៃមន្ទីរបញ្ជកោណបានលើកឡើងថា ខ្លួនបានជូនដំណឹងដល់រដ្ឋសភាអំពីការសម្រេចលក់អាវុធនេះកាលពីម្សិលមិញ ហើយថាវាចាំបាច់ដើម្បីជួយកោះតៃវ៉ាន់នៅក្នុងការការពារខ្លួន។
ជាការឆ្លើយតប ក្រសួងការពារជាតិចិនបានលើកឡើងថា រដ្ឋាភិបាលក្រុងប៉េកាំង “ជំទាស់ដាច់ខាតចំពោះការលក់សព្វាវុធនេះ ជាពិសេសទំនាក់ទំនងរវាងយោធាអាមេរិកជាមួយកោះតៃវ៉ាន់”។
សូមរំឮកថា សហរដ្ឋអាមេរិកធ្លាប់ប្រកាសថា ខ្លួនបានលក់អាវុទៅឲ្យកោះតៃវ៉ាន់គិតជាទឹកប្រាក់រហូតជាង១៥ពាន់លានដុល្លារឯណោះ បើគិតចាប់តាំងពីឆ្នាំ២០១០មក៕