ខេត្តស្វាយរៀង ៖ បុរសម្នាក់ គ្រាន់តែកម្លាំងសមត្ថកិច្ចជិះម៉ូតូដេញតាមពីក្រោយដោយប្រាប់ថា កុំឲ្យជិះម៉ូតូលឿនពេកព្រោះខ្លាចបង្កគ្រោះថ្នាក់ ស្រាប់តែក្ដៅចិត្តខឹងឆេវ យកដែកកេះដុតម៉ូតូខ្លួនឯងចោល ឆេះខ្ទេចសល់តែឆ្អឹងដែក ។
ហេតុការណ៍នេះកើតឡើងកាលពីម៉ោង១១និង៣០នាទី ថ្ងៃទី២ ខែកក្កដា ឆ្នាំ២០១៩នេះ នៅខាងក្រោមស្ពានតាហោ(ផ្លូវវាង) ស្ថិតក្នុងភូមិក្បាលស្ពាន សង្កាត់ពោធិ៍តាហោ ក្រុងស្វាយរៀង ខេត្តស្វាយរៀង ។
បើតាមសមត្ថកិច្ច បានឲ្យដឹងថា នៅមុនពេលកើតហេតុ កម្លាំងបានគេឃើញបុរសម្នាក់ មិនស្គាល់អត្តសញ្ញាណ ជិះម៉ូតូមួយគ្រឿងម៉ាកវ៉េវ ពណ៌ក្រហម គ្មានស្លាកលេខ ធ្វើដំណើរពីលិចទៅកើត ក្នុងល្បឿនយ៉ាងលឿន លុះមកដល់ចំណុចកើតហេតុខាងលើ ក៏ត្រូវសមត្ថកិច្ចជិះដេញពីក្រោយ ហើយឃាត់អោយឈប់ ដោយបានប្រាប់បុរសខាងលើថា ឲ្យឈប់និងកុំបើកបរលឿនពេក ព្រោះស្ពានគេកំពុងជួសជុលផង ខ្លាចមានគ្រោះថ្នាក់ ស្រាប់តែបុរសជិះម៉ូតូទំនងជាស្រវឹងផង និយាយទាំងខឹងថា «គេបើកតែគេ បើគ្រោះថ្នាក់ ក៏គ្រោះថ្នាក់តែគេដែរ គ្មានអីពាក់ព័ន្ធទេ» និយាយរួចក៏ផ្តួលម៉ូតូ ទាញយកដែកកេះ មកដុតឆេះខ្ទេច ហើយដើរចេញទៅធ្វើមិនដឹង ។
បន្ទាប់ពីដុតម៉ូតូរួច សមត្ថកិច្ចក៏បានឃាត់ខ្លួនជននោះ យកទៅស្នងការដ្ឋានខេត្តស្វាយរៀង ដើម្បីសួរនាំ និងធ្វើតេស្តទឹកនោម ក្រែងមានសាធាតុញៀន ៕