ខេត្តក្រចេះ ៖ ប្រភពព័ត៌មានបានរាយការណ៍ជាបឋមអោយដឹងថា សង្ស័យជាករណីឃាតកម្មដ៏សាហាវមួយ ដោយបុរសម្នាក់ត្រូវបានគេដុតសម្លាប់ឆេះខ្លោចរួញក្រញ៉ង រួមនិងម៉ូតូ១គ្រឿង ក្នុងភ្នក់ភ្លើងកំពុងឆេះ។
សពជនរងគ្រោះ ត្រូវបានកម្មករជៀរជ័រកៅស៊ូម្នាក់ ប្រទះឃើញកាលពីវេលាម៉ោង១២ថ្ងៃត្រង់ ថ្ងៃទី២៦ មិថុនា ២០១៩ នេះចំណុចដីឡូតិ៍កៅស៊ូ ចម្ងាយពីផ្លូវលំ ប្រមាណជា១០០ម៉ែត្រ ត្រង់ចំណុចផ្លូវកាំភ្លើងធំ ក្នុងឡូតិ៍ចម្ការកៅស៊ូក្រុមហ៊ុនស្នួល ភូមិដូនប៉ុក ឃុំស្រែចារ ស្រុកស្នួល ខេត្តក្រចេះ ។
កម្លាំងសមត្ថកិច្ចបានចុះទៅដល់កន្លែងកើតហេតុក្រោយពីទទួលបានដំណឹងពីកម្មករជៀរជ័រកៅស៊ូ និងធ្វើការហ៊ុមព័ទ្ធ ជុំវិញកន្លែងកើតហេតុ ។
ទោះជាយ៉ាងណា អត្តសញ្ញាណជនរងគ្រោះដែលត្រូវគេដុតសម្លាប់យ៉ាងព្រៃផ្សៃនេះ នៅមិនទាន់ស្គាល់នៅឡើយ ។
ពេលនេះកម្លាំងសមត្ថកិច្ចជំនាញកំពុងធ្វើការស្រាវជ្រាវ និងធ្វើកោសល្យវិច័យលើសាកសព រួមនិងពិនិត្យនៅក្បែរកន្លែងកើតហេតុឃើញមានស្រាបៀរចំនួន៣កំប៉ុង ប្រអប់ស្នោរចំនួន១ ផងដែរ ។ ព័ត៌មានលម្អិតនឹងផ្សាយជូនបន្ត…