ភ្នំពេញ៖ ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ នៅមជ្ឈមណ្ឌលកោះពេជ្រ នាថ្ងៃទី៣ ខែមិថុនា ឆ្នាំ២០១៩ សម្ដេចនាយករដ្ឋមន្ត្រីហ៊ុន សែន បានថ្លែងដោយប្រើពាក្យធ្ងន់ៗទៅលើ អតីតប្រធានគណបក្សប្រឆាំង និងបបួលមកស្បថឲ្យរន្ទះបាញ់ ជុំវិញការចោទប្រកាន់របស់លោកសម រង្ស៊ី ដែលថា សម្ដេចជាអ្នកសម្លាប់អគ្គស្នងការរងនគរបាលជាតិ លោកហុក ឡង់ឌី កាលពីឆ្នាំ២០០៨កន្លងទៅ។
សម្ដេចនាយករដ្ឋមន្ត្រីបញ្ជាក់ថា៖ “ពួកហ្អែងមិនហ៊ានស្បថទេ ព្រោះនិយាយខុស”។ តែសម្ដេចវិញ ហ៊ានស្បថដាក់ជីវិត និងក្រុមគ្រួសារទាំងមូល។ ក្រៅពីបបួលលោក សម រង្ស៊ី ស្បថ សម្ដេចនាយករដ្ឋមន្ត្រីហ៊ុន សែន បានថ្លែងព្រមានថា ការធ្វើសកម្មភាពកាន់តែខ្លាំងពីខាងក្រៅស្រុក អាចនឹងធ្វើឲ្យក្រុមជ្រុលនិយមនៅក្នងស្រុកកាន់តែពិបាកទៅវិញទេ។
សម្ដេចបញ្ជាក់ថាចលនាឧទ្ទាមណាមួយ មិនអនុញ្ញាតជាដាច់ខាត ហើយដំណើរការប្រជាធិបតេយ្យនៅតែធ្វើ។
កាលពីថ្ងៃទី២ ខែមិថុនា លោក សម រង្ស៊ី តាមរយៈទំព័រហ្វេសប៊ុករបស់លោក បានសរសេរថា លោក ហ៊ុន សែន ជាអ្នកសម្លាប់លោកហុក ឡង់ឌី តាមរយៈការដាក់គ្រាប់បែកឲ្យផ្ទុះក្នុងឧទ្ធម្ភាគចក្រ (Helicopter) នៅពេលដែលកំពុងតែហោះហើរ លើខេត្តស្វាយរៀង កាលពីថ្ងៃទី០៩ ខែវិច្ឆិកា ឆ្នាំ ២០០៨ កន្លងទៅ។
លោក សម រង្ស៊ី បានសរសេរទៀតថា លោក ឌី វិជ្ជា សព្វថ្ងៃជាអគ្គស្នងការរងនគរបាលជាតិ ជាកូនប្រុសច្បង របស់លោក ហុក ឡង់ឌី ឥឡូវនេះ លោក ឌី វិជ្ជា ដឹងច្បាស់ពីឃាតកម្មលើបិតារបស់លោក ហើយ លោក ឌី វិជ្ជា កំពុងតែគិតគូរអំពីផែនការសងសឹកឲ្យបិតារបស់លោក៕
