ខេត្តព្រះសីហនុ ៖ ប្រភពពីសមត្ថកិច្ចអោយដឹងថា ស្ត្រីជាប្រពន្ធ និងជនសង្ស័យដែលសម្លាប់ក្មេងស្រីប្រុស២នាក់បងប្អូន នៅជិតវត្តអូរត្រេះ ក្នុងភូមិគគី ឃុំបិតត្រាង ស្រុកព្រៃនប់ បានបញ្ជូនមកដល់ខេត្តព្រះសីហនុ ហើយ នៅវេលាម៉ោងជាង១រំលងអាធ្រាត្រឈានចូលថ្ងៃទី៣ ខែមិថុនា ឆ្នាំ២០១៩ ។
លោកវរសេនីយ៍ឯក ជាវ វិបុល អាយុ២៦ឆ្នាំ អនុប្រធាននាយកដ្ឋាននគរបាលព្រហ្មទណ្ឌ បានឲ្យដឹងថា កម្លាំងនគរបាល នាំខ្លួនជនដៃដល់ឈ្មោះ មាង វិចិត្រ ប្រគល់ទៅឲ្យសមត្ថកិច្ចខេត្តព្រះសីហនុនេះ ដើម្បីកសាងសំណុំរឿង បញ្ជូនទៅកាន់តុលាការផ្ដន្ទាទោសតាមច្បាប់ ។
យោងតាមចម្លើយសារភាពជាបឋមរបស់ជនសង្ស័យជាឃាតករ ឈ្មោះ មាង វិចិត្រ បានប្រាប់នគរបាលថា មូលហេតុដែលបណ្ដាលឲ្យរូបគេសម្លាប់ក្មេងទាំងពីរនាក់នោះ មកពីរូបគេស្រវឹងស្រា ហើយប្រើគ្រឿងញៀន ។
ជនសង្ស័យសារភាពបន្តថា មុនពេលកើតហេតុ រូបគេបានទៅទិញគ្រឿងញៀនពីបុរសម្នាក់ នៅឆ្នេរអូឈើទាល បន្ទាប់មករូបគេ ក៏ទៅទិញស្រាថ្នាំ យកមកអង្គុយផឹក ក្នុងបន្ទប់ជួល ក្រោយមករូបគេ ក៏ចេញពីក្នុងបន្ទប់ ដើរមកកាត់មុខផ្ទះរបស់ក្មេងស្រីរងគ្រោះ ហើយឃើញក្មេងស្រីនោះ កំពុងតែលេងម្នាក់ឯង រូបគេក៏ចូលទៅប្រឡែងលេងជាមួយ បន្ទាប់មកធ្វើឲ្យរូបគេមានអារម្មណ៍ផ្លូវភេទជាមួយក្មេងស្រីនោះ រូបគេក៏យកខ្នើយមកខ្ទប់មុខក្មេងស្រីរងគ្រោះ ហើយធ្វើសកម្មភាពចាប់រំលោភក្មេងស្រីនោះ រហូតដល់នាងសន្លប់បាត់ស្មារតី ។
ជនសង្ស័យសារភាពបន្ថែមទៀតថា បន្ទាប់មកប្អូនប្រុសរបស់ក្មេងស្រីរងគ្រោះ បានដើរចូលមកដល់ ស្រពពេលដែលខ្លួនកំពុងប្រព្រឹត្ត ដោយខ្លាចបែកការណ៍ ជនសង្ស័យក៏ស្ទុះទៅទះកំផ្លៀងក្មេងប្រុសនោះ និងទាត់ធាក់ក្មេងប្រុសរងគ្រោះ ទៅផ្ទប់នឹងជញ្ជាំង បណ្ដាលអោយក្មេងប្រុសនោះស្លាប់ភ្លាមៗនៅនឹងកន្លែងកើតហេតុ ។
ជនសង្ស័យអោយដឹងទៀតថា ក្រោយសម្លាប់រួច រូបគេក៏រត់មកផ្ទះជួលវិញ ហើយបបួលប្រពន្ធរបស់គេរត់ទៅលាក់ខ្លួននៅស្រុកកំណើត រហូតដល់សមត្ថកិច្ចចាប់ខ្លួនបាននៅរសៀលថ្ងៃទី២ មិថុនា ២០១៩ ។
ទោះជាយ៉ាងណា ពេលនេះ មន្ត្រីនគរបាលជំនាញកំពុងសាកសួរយកចម្លើយបន្ថែមពីជនសង្ស័យ ដើម្បីរៀបចំកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់ ៕