ខេត្តកណ្តាល៖ ស្រ្តីម្នាក់ទើបតែសម្រាលកូនបានរយៈពេល១ខែ បានសុំលុយប្តីរបស់ខ្លួនចំនួន៥ម៉ឺនរៀល ដើម្បីយកទៅកាត់ថ្នេរដែលដេរពេលសម្រាលកូនរួច ពេលនោះប្ដីមិនឲ្យ ក៍ទាស់ពាក្យសំដីឈ្លោះប្រកែកគ្នា ប្រពន្ធចោទប្ដីថាជក់ម៉ា ឯប្ដីចោទថាប្រពន្ធផិតក្បត់ រួចវាយប្រពន្ធឲ្យរងរបួសធ្ងន់ ត្រូវសមត្ថកិច្ចឃាត់ខ្លួន។
ហេតុការណ៍នេះកើតឡើងនៅថ្ងៃទី២៩ ខែឧសភា ឆ្នាំ២០១៩ ចំណុចភូមិថ្មី ឃុំជ្រៃលាស់ ស្រុកពញាឮ ។
ជនរងគ្រោះជាប្រពន្ធ ឈ្មោះ ស ស្រីនុច ភេទស្រី អាយុ៣៤ឆ្នាំ ជនជាតិខ្មែរ មុខរបរនៅផ្ទះ មានទីលំនៅភូមិថ្មី ឃុំជ្រៃលាស់ ស្រុកពញាឮ ។ ឯជនសង្ស័យជាប្ដី ឈ្មោះ នៅ សុគន្ធ ភេទប្រុស អាយុ៣៣ឆ្នាំ ជនជាតិខ្មែរ មុខរបរកសិករ មានសារធាតុញៀននៅក្នុងទឹកនោម ។
មុនពេលកើតហេតុ ស្រ្តីជាប្រពន្ធសុំបានលុយពីប្តីចំនួន៥ម៉ឺនរៀល ដើម្បីយកទៅកាត់ថ្នេរដែលដេរពេលសម្រាលកូនរួច ពេលនោះប្ដិមិនឲ្យ ក៍ទាស់ពាក្យសំដីឈ្លោះប្រកែកគ្នា ហើយស្រ្តីជាប្រពន្ធឈឺចិត្តពេក បានស្ទុះទៅយកកូនកាបិតចុងស្រួច ដើម្បីចាក់ខ្លួនឯង ភ្លាមនោះប្តីក៏ឃាត់ ស្រាប់តែស្រ្តីជាប្រពន្ធដៀលប្តីថា ជាមនុស្សជក់ម៉ា ប្តីក៍ដៀលប្រពន្ធវិញថា ៖ ឯងក៏ជាស្រីផិតប្តីដែរ រួចជនសង្ស័យជាប្តីបានស្ទុះទៅច្របាច់ក ជនរងគ្រោះ និងទះចំមុខជនរងគ្រោះចំនួន២ដៃ បណ្តាលឲ្យជាំច្រមុះ មិនតែប៉ុណ្ណោះ ជនសង្ស័យបានចាប់កដៃជនរងគ្រោះបោកនិងដី បណ្តាលឲ្យហើមកដៃខាង ឆ្វេង របួសថ្ងាស និងក្បាល។
លុះមកដល់ព្រឹកថ្ងៃទី៣០ ខែឧសភា ឆ្នាំ២០១៩ វេលាម៉ោង ៨និង២៥នាទីព្រឹក ជនរងគ្រោះជាប្រពន្ធ បានមកដាក់ពាក្យបណ្តឹង នៅប៉ុស្តិ៍នគរបាលជ្រៃលាស់។
បន្ទាប់ពីទទួលពាក្យបណ្តឹងពីជនរងគ្រោះជាប្រពន្ធ កម្លាំងប៉ុស្តិ៍ សហការជាមួយកម្លាំងផ្នែកជំនាញស្រុក ចុះឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុកពញាឮ ដើម្បីសាកសួរ និងកសាងសំណុំរឿង តាមនីតិវិធី៕
