ខេត្តកំពត ៖ លោក ជាវ តាយ អភិបាលខេត្តកំពត បានបញ្ជាក់នៅក្នុងអង្គសន្និសិតសារព័តមាន នៅឯសាលាខេត្តកំពត នៅរសៀលថ្ងៃទី២៧ ខែឧសភា ឆ្នាំ២០១៩ ឆ្លើយតបទៅនឹងព័ត៌មាននាពេលថ្មីៗនេះដែលបានចុះផ្សាយអំពីករណីបោះបង្គោលចូលទៅក្នុងសមុទ្រ ស្ថិតភូមិសាស្ត្រតំបន់ភ្នំដូង ភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពតនោះ គឺជាដីកម្មសិទ្ធពិតប្រាកដមានច្បាប់ត្រឹមត្រូវ ។
ការប្រកាសរបស់លោក ជាវ តាយ បែបនេះ ធ្វើឡើងបន្ទាប់ពីក្រុមការងាររបស់រដ្ឋបាលខេត្តកំពត បានបិទបញ្ចប់ការស្រាវជ្រាវរបស់ខ្លួន និងបានបង្ហាញឯកសារមួយចំនួន ដោយអះអាងថា ម្ចាស់ដីពិតជាបានគ្រប់គ្រងដីនេះ ស្របតាមច្បាប់ឯកសារច្បាប់ត្រឹមត្រូវមែន ។
បើតាមអភិបាលខេត្ដកំពត លោក ជាវ តាយ អះអាងថា ការបោះបង្គោលលើដីសមុទ្រទំហំជាង១ហិកតា ស្ថិតនៅសង្កាត់ត្រើយកោះ ក្រុង-ខេត្តកំពត ម្ចាស់ដីពិតជាមានប្លង់ត្រឹមត្រូវតាមច្បាប់ ហើយដីនេះ ត្រូវបានចេញឲ្យម្ចាស់ដី តាំងពីឆ្នាំ២០០៨ ។ តាំងដើមឡើយ ដីនេះមានស្ថានភាពមិនដូចពេលនេះទេ គឺជាប្រភេទដីអូរចិញ្ចឹមបង្គា និងក្ដាមដែលអាចឲ្យប្រជាពលរដ្ឋចាប់យកដីនេះ ដើម្បីប្រកបរបរចិញ្ចឹមបង្គា និងក្ដាមដោយមាន ចំនួន១២គ្រួសារ ជាអ្នកកាន់កាប់ និងអាស្រ័យផល ហើយមានទំហំផ្ទៃដីសរុបស្មើនឹង៤៥,៦១៤ហិចតា ។ រហូតដល់ឆ្នាំ២០០៨ ប្រជាពលរដ្ឋបានដាក់ពាក្យស្នើសុំប័ណ្ណកម្មសិទ្ធិ កាន់កាប់ដីនេះស្របច្បាប់ ជូនទៅរាជរដ្ឋាភិបាលតាមរយៈអាជ្ញាធរខេត្ត និងមានការសម្រេចជូនពីរាជរដ្ឋាភិបាល ឲ្យប្រជាពលរដ្ឋទាំង១២គ្រួសារនេះទៀតផង ព្រមទាំងយល់ព្រមឲ្យកែប្រែប្រភេទដីនេះ ទៅជាតំបន់ទេសចរណ៍ធម្មជាតិ ឬទេសចរណ៍កែច្នៃ ដែលឯកសារពាក់ព័ន្ធដីកម្មសិទ្ធិ របស់ប្រជាពលរដ្ឋនេះ ត្រូវរដ្ឋបាលខេត្តបង្ហាញជូនអ្នកសារព័ត៌មាន តាមរយៈបញ្ចាំងស្លាយផងដែរ ។
ទោះយ៉ាងណាអភិបាលខេត្តនេះ បន្ថែមថា លោកកំពុងតែស្វែងរកបុគ្គលដែលប្រកាសលក់ដី ឲ្យមកបំភ្លឺនៅរដ្ឋបាលខេត្ត ជុំវិញដីដែលប្រកាសលក់ ថាបានដីមកពីណា ស្របពេលលោកក៏បានណែនាំឲ្យមន្ត្រីធ្វើការបន្តទៀតថា គួរដកបង្គោលនោះចេញ ឬយ៉ាងណា ? ព្រោះតាមផ្លូវច្បាប់ មិនអាចមានកម្មសិទ្ធិនៅលើទឹកទេ ។
លោកបញ្ជាក់យ៉ាងដូច្នេះថា ៖ «ខ្ញុំគ្រាន់តែធ្វើការងារឲ្យវាស្របច្បាប់ បើខុសច្បាប់ យើងចាត់វិធានការ មិនអាចទុកឲ្យអនាធិបតេយ្យ ក្រៅច្បាប់ទេ ។ ខ្ញុំអនុវត្តច្បាប់បទដ្ឋានគតិយុត្តិ បើអ្វីដែលមានតាមច្បាប់ពីលើមក ខ្ញុំគោរពតាមហ្នឹង ។ វាមិនខុសច្បាប់អីទេ ព្រោះយោងទៅច្បាប់ លិខិតអី ព្រោះជំនាន់នោះ ខ្ញុំមិនទាន់មកគ្រប់គ្រងទេ» ។
អ្នកសារព័ត៌មានយើងមិនអាចទាក់ទងបុគ្គលដែលអះអាងថា ជាម្ចាស់មានប្លង់រឹងត្រឹមត្រូវនោះបានទេ ពីម្សិលមិញ រួមនឹងក្រុមហ៊ុន១ ឈ្មោះ BLUE STAR REAL ESTATE Co.,Ltd បានផ្សព្វផ្សាយបង្ហោះលើបណ្តាញសង្គម កាលពីថ្ងៃទី១៧ ខែឧសភា ជុំវិញការលក់អចលនទ្រព្យ និងលក់ដីដែលបានបោះបង្គោលចូលសមុទ្រ ទំហំជាង១ហិកតា ស្ថិតនៅសង្កាត់ត្រើយកោះ ក្រុង-ខេត្តកំពត ដោយអះអាងថា ម្ចាស់ដីមានប្លង់ដីត្រឹមត្រូវ ។
ការបង្ហោះរូបប៉ុន្មានសន្លឹកដាក់លក់នៅលើហ្វេសប៊ុក ដែលបង្ហាញពីបង្គោលសសរព្រោងព្រាត នៅក្នុងទឹកសមុទ្រដ៏ធំល្វឹងល្វើយផុតកន្ទុយភ្នែកនេះ ក៏ត្រូវបានអ្នកលេងបណ្តាញទំនាក់ទំនងសង្គម និងមជ្ឈដ្ឋានទូទៅ រិះគន់រហូតឈានដល់មានការបង្កើតក្រុមការងារចម្រុះខេត្ត ដើម្បីចុះស៊ើបអង្កេតជុំវិញបញ្ហានេះ ។ បើទោះបីជា មានការបកស្រាយពីអភិបាលខេត្តរួចហើយក្តី ប៉ុន្តែមហាជននៅតែមានចម្ងល់ជាដដែល ពីព្រោះពួកគាត់យល់ឃើញថា ដីក្នុងសមុទ្រមានប្លង់កម្មសិទ្ធិ រីឯដីលើគោកជិតតំបន់ខាងលើ បែរជាមិនមានប្លង់កម្មសិទ្ធិចេញដោយអាជ្ញាធរឡើយ ៕