ខេត្តកណ្តាល ៖ ចាប់ពីម៉ោង៨ព្រឹកថ្ងៃទី២៨ ឧសភា ២០១៩ ស្អែកនេះ ក្រសួងមហាផ្ទៃ បានអញ្ជើញលោកស្នងការរងចំនួន៦រូប ដើម្បីចូលមកបំភ្លឺនៅអគ្គាធិការដ្ឋាន អគារជាន់ទី៣ នៃក្រសួងមហាផ្ទៃ ពាក់ព័ន្ធបណ្តឹងអនាមិក ប្តឹងលោកឧត្តមសេនីយ៍ទោ អ៊ាវ ចំរើន ស្នងការខេត្តកណ្តាល ១៦ករណី ផ្សេងគ្នា ។
លោកស្នងការរងទាំង៦រូប ដែលត្រូវចូលខ្លួនមកបំភ្លឺនៅក្រសួងមហាផ្ទៃ នាថ្ងៃស្អែកនេះ រួមមាន ៖
១-លោកឧត្តមសេនីយ៍ត្រី រឿន ណារ៉ា ស្នងការរង ៖ វេលាម៉ោង៨ព្រឹក
២-លោកឧត្តមសេនីយ៍ត្រី វ៉ែន សុវិន ស្នងការរង ៖ វេលាម៉ោង៩ព្រឹក
៣-លោកឧត្តមសេនីយ៍ត្រី ចាន់ សាវឿន ស្នងការរង ៖ វេលាម៉ោង១០ព្រឹក
៤-លោកឧត្តមសេនីយ៍ត្រី តុប សុវណ្ណ ស្នងការរង ៖ វេលាម៉ោង១៤រសៀល
៥-លោកឧត្តមសេនីយ៍ត្រី សេង គីមឃន ស្នងការរង ៖ វេលាម៉ោង១៥រសៀល
៦-លោកឧត្តមសេនីយ៍ត្រី ឈឿន សុចិត្ត ស្នងការរង ៖ វេលាម៉ោង១៦រសៀល ។
កន្លងមក ក្រសួងមហាផ្ទៃ ធ្លាប់បានចាត់ប្រតិភូមួយក្រុមឲ្យចុះមកធ្វើអធិការកិច្ចលើពាក្យបណ្តឹងអនាមិកមួយដែលផ្ញើជូនទៅសម្ដេចក្រឡាហោម ស ខេង កាលពីពីថ្ងៃទី១៩ មេសា ២០១៩ របស់នាយ នាយរង និងមន្ត្រីនគរបាល នៃស្នងការដ្ឋាននគរបាលខេត្តកណ្តាល ប្តឹងលោកស្នងការ អ៊ាវ ចំរើន ដោយចោទប្រកាន់ថា លោកស្នងការប្រើអំណាចផ្តាច់ការ ធ្វើបាបកូនចៅ និងប្រព្រឹត្តអំពើពុករលួច ដែលមានរូបភាពផ្សេងៗគ្នា ចំនួន១៦ករណី ។ បណ្ដឹងអមទៅដោយស្នាមមេដៃ និងគ្មានឈ្មោះ បានស្នើទៅសម្តេចក្រឡាហោម ស ខេង ឲ្យដកហូតតំណែងស្នងការនគរបាលខេត្តកណ្ដាលរូបនេះ ។
បណ្តឹងអនាមិកនេះ បានផ្ទុះឡើង បន្ទាប់ពីលោកស្នងការនគរបាលខេត្តកណ្តាល អ៊ាវ ចំរើន បានចេញសេចក្តីសម្រេចដកតំណែង មន្ត្រីនគរបាលស្រុកស្អាងចំនួន៣នាក់ បន្ទាប់ពីរកឃើញថា ពួកគេមានការជាប់ពាក់ព័ន្ធ នឹងអំពើកាង បនល្បែងស៊ីសងខុសច្បាប់ជាច្រើនកន្លែង ក្នុងមូលដ្ឋានដែលពួកគេគ្រប់គ្រង ។
ពាក់ព័ន្ធនឹងករណីក្រសួងមហាផ្ទៃកោះហៅស្នងការរងទាំង៦រូប ចូលបំភ្លឺនៅក្រសួងនោះ លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានប្រាប់អ្នកសារព័ត៌មាន នៅរសៀលថ្ងៃទី២៧ ឧសភានេះថា នេះជានីតិវិធីរបស់ក្រុមអធិការកិច្ចរបស់ក្រសួងមហាផ្ទៃ ហើយមិនមែនលោកស្នងការរងទាំង៦រូបខាងលើនេះ ប្តឹងរូបលោកនោះដែរ ព្រោះកន្លងមកអធិការកិច្ចបានចុះមកស៊ើបសួរម្តងរួចហើយ នៅស្នងការដ្ឋាននគរបាលខេត្តកណ្តាល ។ លទ្ធផលយ៉ាងណានោះ រង់ចាំមើលក្រោយការចូលបំភ្លឺរបស់លោកស្នងការរងទាំង៦រូប ៕
