ភ្នំពេញ ៖ បន្ទាប់ពីមានអំពើឃាតកម្មលើយុវជនម្នាក់ ដែលត្រូវឃាតករកាប់សម្លាប់ឡើងសុះខ្លួន យ៉ាងសាហាវបំផុត នៅក្នុងបន្ទប់ជួលរបស់ឪពុកមាដែលបើកធ្វើធ្មេញ មកដល់ម៉ោងនេះ សមត្ថកិច្ចកំពុងធ្វើកោលស្យវិច័យនៅកន្លែងកើតហេតុនៅឡើយ ដោយរកឃើញនៅក្បែរសាកសព មានដបសាំងមួយ បើតាមការសង្ស័យឃាតករអាចនឹងសម្លាប់ហើយ ដុតសាកសពចោលតែម្តង ។
ហេតុការណ៍នេះកើតឡើង នៅវេលាម៉ោងប្រមាណ៧និង៣០នាទីព្រឹកថ្ងៃទី២០ ឧសភា នេះត្រង់នៅចំណុចផ្ទះជួលបើកពេទ្យធ្មេញ ម្តុំផ្សារត្រពាំងព្រាយ ផ្លូវលេខ១៥១ ក្នុងភូមិបឹង សង្កាត់ពញ្ញាពន់ ខណ្ឌព្រែកព្នៅ ។
សមត្ថកិច្ចដែលកំពុងស្រាវជ្រាវករណីឃាតកម្មខាងលើនេះ បានឲ្យដឹងថា នៅលើខ្នងសាកសពយុវជនរងគ្រោះ មានស្នាមកាប់ និងមានស្នាមរលាកជាច្រើនកន្លែងទៀត ប៉ុន្តែប្រហែលជាឱកាសមិនអំណោយផល ទើបឃាតករនាំគ្នារត់បាត់ទៅ ។ យ៉ាងណា នៅក្បែរសាកសពយុវជនរងគ្រោះ សមត្ថកិច្ចបានរកឃើញដបសាំងមួយដបផងដែរ ។
យុវជនរងគ្រោះខាងលើមានឈ្មោះធន់ រ៉ាវីន អាយុ១៩ឆ្នាំ មានលំនៅភូមិត្រគួន ឃុំក្រឡា ស្រុកកំពង់សៀម ខេត្តកំពង់ចាម ស្នាក់នៅជាមួយឪពុកមាឈ្មោះមឿន សុវត្ថា ជាពេទ្យធ្មេញ នៅចំណុចកើតហេតុខាងលើ ។
ដោយឡែក បើតាមការសួរសង្សាររបស់យុវជនរងគ្រោះ នាងបានប្រាប់សមត្ថកិច្ច ថា កាលពីយប់មិញ វេលាម៉ោង៩យប់ ថ្ងៃទី១៩ ខែឧសភា ឆ្នាំ២១០៩ នាងនិងយុវជនរងគ្រោះ (សង្សារ) បាននាំគ្នាទៅញាំប្រហិត ។ លុះដល់ម៉ោងជិត១០យប់ នាងនិងសង្សារបានបបួលគ្នាមកផ្ទះ ហើយសង្សាររបស់នាងបានជូននាងមកដល់ផ្ទះ ហើយក៏បានចេញទៅផ្ទះរបស់គាត់បាត់ទៅ ដោយមានបញ្ហាជាមួយនរណាម្នាក់នោះទេ លុះព្រឹកឡើង (ថ្ងៃកើតហេតុ) ក៏មានការភ្ញាក់ផ្អើលពីការសម្លាប់នេះតែម្តង ។
ទោះបីជាយ៉ាង គេពុំដឹងថា យុវជននោះ មានរឿងអ្វីនោះទេ ទើបត្រូវគេសម្លាប់ ។ បើតាមសមត្ថកិច្ច មានការសង្ស័យអាចជារឿងគំនុំ ឬអាចផ្តើមចេញពីស្នេហាត្រីកោណ ។ បើតាមការពិនិត្យកើតហេតុ ឃើញសុទ្ធតែឈាម ហើយយុវជនរូបនេះ អាចមានការប្រតាយប្រតប់គ្នាជាមួយឃាតករទៀតផង ៕
