ភ្នំពេញ៖ ឆេះកប៉ាល់ដឹកប្រេងរបស់ក្រុមហ៊ុន SAVLMEX ចតនៅកណ្តាលទន្លេយ៉ាងសន្ធោសន្ធៅផ្អើលសមត្ថកិច្ច ត្រូវបានរថយន្តពន្លត់អគ្គិភ័យជួយបាញ់ទឹកពន្លត់ទាន់ពេលវេលា ហេតុការណ៍នេះកើតឡើងកាលពីវេលាម៉ោង៥និង១៥នាទីទាបភ្លឺ ថ្ងៃទី១៥ ខែឧសភា ឆ្នាំ២០១៩ នៅក្នុងទឹកទន្លេទល់មុខនឹងក្រុមហ៊ុន SAVLMEX ស្ថិតនៅក្នុងសង្កាត់គីឡូម៉ែត្រលេខ៦ ខណ្ឌឬស្សី កែវ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុនៅវេលាម៉ោងកើតហេតុខាងលើនេះ មានប្រជាពលរដ្ឋបានរាយការណ៍ទៅឲ្យខាងសមត្ថកិច្ចប៉ុស្តិ៍គីឡូម៉ែតលេខ៦ថាមានករណីអគ្គិភ័យឆេះកប៉ាល់ដ៏ធំមួយគ្រឿងដឹកប្រេងចំនុះ៦ពាន់តោន របស់ក្រុមហ៊ុន SAVLMEX ចតនៅកណ្តាលទន្លេសុខៗស្រាប់តែឆ្លងចរន្តពីម៉ាស៊ីនកប៉ាល់ក្តៅខ្លាំងពេក ហើយហៀរប្រេងម៉ាស៊ីនបណ្តាលឲ្យផ្ទុះឆាបឆេះយ៉ាងសន្ធោសន្ធៅផ្អើលអស់សមត្ថកិច្ចមួយខណ្ឌឬស្សីកែវដុតដៃដុតជើងរកវិធី បើកកប៉ាល់មកអែបមាត់ច្រាំងដើម្បីងាយស្រួលឲ្យរថយន្តពន្លត់អគ្គីភ័យមកជួយអន្តរាគមន៍ ចំនួន៩គ្រឿងដើម្បីទប់ស្កាត់កុំឲ្យរាយដាលទៅដល់កន្លែងផ្សេង ពីព្រោះទល់មុខហ្នឹងជាកន្លែងស្តុបប្រេង ។ អគ្គិភ័យខាងលើ ប្រើប្រាស់រថយន្តពន្លត់អគ្គីភ័យអស់ចំនួន៩គ្រឿង ។
សូមបញ្ជាក់ថានៅលើកប៉ាល់មុនឆាបឆេះ មានកម្មករកំពុងតែបូមប្រេងចូលក្នុងស៊ីទែនស្តុករបស់ក្រុមហ៊ុន ខណៈពេលឆាបឆេះបណ្តាលឲ្យកម្មករម្នាក់រងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត និងបានរលត់អស់ទាំងស្រុងនៅវេលាម៉ោង៦និង៣០នាទីព្រឹកថ្ងៃដដែល។ អគ្គិភ័យនេះ ឆេះខូចខាតកប៉ាល់ និងប្រេងដែលស្តុកនៅក្នុងកប៉ាល់៕