ភ្នំពេញ ៖ ព្រឹកថ្ងៃទី២៥ មេសា ២០១៩ នេះនៅក្នុងបណ្តាញទំនាក់ទំនងតេឡេក្រាម លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងបែបជាសំណួរទៅកាន់អតីតបក្សប្រឆាំងនៅក្រៅប្រទេសថា ប្រជាជនកម្ពុជាកើនដល់១៦លាននាក់ ទ្វេ១ជា២ជា៣ បើមិនកាប់ព្រៃឈើខ្លះ តើបានដីឯណាសង់លំនៅដ្ឋាន និងបង្កបង្កើនផល ? បើមិនកាប់ព្រៃឈើខ្លះ ធ្វើម៉េចបានដី ដើម្បីអភិវឌ្ឍន៍ប្រទេស ?
លោក សុខ ឥសាន បានលើកឡើងបែបនេះ បន្ទាប់ពីរយៈពេលថ្មីៗនេះ ការឡើងកម្កៅនិងអាកាសធាតុហួតហែងខ្លាំង បានធ្វើក្រុមអតីតបក្សប្រឆាំងមានហេតុផលរិះគន់រដ្ឋាភិបាលថា មកពីកាប់ព្រៃឈើ ។
លោកអ្នកនាំពាក្យលើកឡើងទៀតថា ក្រុមអ្នកប្រឆាំងនៅតែលើកយកបញ្ហាព្រៃឈើមកវាយប្រហាររដ្ឋាភិបាលបែបនេះ តាំងពី២០ឆ្នាំមុនមកម្ល៉េះ ព្រៃឈើនៅកម្ពុជារលាយអស់ហើយ ហើយរហូតមកដល់ពេលនេះ នៅតែឃោសនាបែបនេះដដែល ។
លោកបង្ហាញអារម្មណ៍ហួសចិត្តថា បើអស់ព្រៃឈើហើយ តើបានព្រៃឈើឯណាមករលាយអស់ទៀត ?
លោកឆ្ងល់ថា ពួកគេនិយាយតែរឿងកាប់ តែការដាំដើមឈើ ពួកគេមិនដែលនិយាយឡើយ ។ ជាក់ស្តែង ចំការកៅស៊ូ ដែលកើនឡើងពី៥ម៉ឺន រហូតតដល់៤០ម៉ឺនហិកតា តើចំការកៅស៊ូទាំងនោះជាព្រៃឈើឬទេ ?
