ភ្នំពេញ ៖ អគ្គិភ័យមួយបានឆាបឆេះ នៅផ្ទះសំអាងការមួយយីហោ «អប្សរាភ្នំពេញ» នៅវេលាម៉ោង១៥និង៣០នាទីរសៀលថ្ងៃទី២៤ មេសា ២០១៩ ដែលមានទីតាំងនៅបណ្ដោយផ្លូវលេខ៦៣ ក្នុងសង្កាត់បឹងរាំង ខណ្ឌដូនពេញ ។
ក្នុងហេតុការណ៍អគ្គិភ័យនោះដែរ គេឃើញរថយន្តបាញ់ទឹកជាច្រើនគ្រឿង ចេញមកជួយបាញ់ទឹកពន្លត់ មិនតែប៉ុណ្ណោះ ក៏មានមន្ត្រីផ្នែកកងអន្តរាគមន៍បាញ់ទឹកខ្លះ ត្រូវឈ្លក់ផ្សែង និងត្រូវរបួសតិចតួចផងដែរ ប៉ុន្តែទោះជាយ៉ាងណា ក្រុមកងកម្លាំងទាំងអស់នោះ បានដុតដៃដុតជើងនាំគ្នាជួយបាញ់ទឹកពន្លត់ភ្លើងរហូតដល់រលត់ទាំងស្រុងនៅវេលាម៉ោង១៦និង៤០នាទីថ្ងៃដដែល ។
លោក សុខ ពេញវុធ អភិបាលខណ្ឌដូនពេញ បានមានប្រសាសន៍ថា ដំបូង គឺទទួលបានព័ត៌មានពីអ្នកជិតខាងថា មានជនរងគ្រោះប្រមាណ៤នាក់ នៅជាប់ខាងក្នុងមិនទាន់ចេញរួចនោះ ទើបកម្លាំងរួមសហការគ្នា មិនគិតពីផលគ្រោះថ្នាក់ខ្លួនឯងនោះទេ ពោលគឺធ្វើយ៉ាងត្រូវតែរកវិធីរំដោះអ្នកដែលនៅខាងក្នុងនៃហេតុការណ៍នោះឲ្យទាន់ពេលផងដែរ ដែលអ្នកទាំងនោះត្រូវបានជួយសង្គ្រោះចេញដោយជោគជ័យ ប៉ុន្តែ មាននារីវ័យក្មេងម្នាក់របួស ដោយជប់ដង្ហើមនឹងផ្សែង ហើយបានបញ្ជូនទៅមន្ទីរពេទ្យភ្លាមៗ ផងដែរ ។
ចំពោះមូលហេតុ នៃការឆេះនោះ ជំហានដំបូងត្រូវបានរកឃើញថា អាចបណ្ដាលមកពីឆ្លងចរន្តអគ្គិសនីនៅបន្ទប់ជាន់ទីមួយ ប៉ុន្តែមិនបណ្តាលឲ្យឆេះរាលដាលដល់ផ្ទះអ្នកជិតខាងនោះទេ ។
សូមបញ្ជាក់ថា គ្រោះអគ្គិភ័យខាងលើនេះ កម្លាំងប៉ូលិសបង្ការនិងពន្លត់អគ្គិភ័យ បានប្រើប្រាស់រថយន្តជាង២០គ្រឿង និងម៉ូតូទឹករបស់រដ្ឋបាលខណ្ឌដូនពេញ ចំនួន៤គ្រឿង ផងដែរ ៕
