រាជធានីភ្នំពេញ ៖ ប្រកាសតែងតាំងមុខតំណែង និងផ្ទេរភារកិច្ច អភិបាលខណ្ឌ អភិបាលរងខណ្ឌ និងនាយករដ្ឋបាលសាលាខណ្ឌនានា នៃរាជធានីភ្នំពេញ សរុប៤៤រូប ឲ្យចូលកាន់តំណែងជាផ្លូវការហើយ ក្នុងនោះមាន ៖ អភិបាលខណ្ឌចំនួន០៣រូប អភិបាលរងខណ្ឌចំនួន៣៨រូប និងនាយករដ្ឋបាលសាលាខណ្ឌចំនួន០៣រូប ។
ពិធីប្រកាសនេះប្រារព្ធធ្វើឡើងនារសៀលថ្ងៃទី២២ ខែមេសា ឆ្នាំ២០១៩នេះ នៅរដ្ឋបាលរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ។
អភិបាលខណ្ឌដែលត្រូវបានប្រកាសឲ្យចូលកាន់តំណែងនៅរសៀលថ្ងៃនេះ រួមមាន ៖ លោក ថេង សុថុល អភិបាលរងខណ្ឌច្បារអំពៅ ត្រូវបានតែងតាំងជាអភិបាលខណ្ឌចំការមន ជំនួសលោក ព្រុំ សំខាន់ ដែលផ្ទេរភារកិច្ចទៅបម្រើការងារនៅសាលារាជធានីភ្នំពេញ ។ លោក ធឹម សំអាន អភិបាលរងខណ្ឌខណ្ឌចំការមន ត្រូវបានតែងតាំងជាអភិបាលខណ្ឌបឹងកេងកង ។ និងលោក ឃឹម ស៊ុនសូដា អភិបាលរងខណ្ឌខណ្ឌពោធិសែនជ័យ ត្រូវបានតែងតាំងជាអភិបាលខណ្ឌកំបូល ដែលខណ្ឌទាំងពីរនេះ ទើបនឹងបំបែកកាលពីពេលកន្លងទៅ ។
ថ្លែងក្នុងឱកាសនោះ លោក ឃួង ស្រេង បានណែនាំឲ្យអភិបាលខណ្ឌទាំងអស់ ពិសេសខណ្ឌទើបប្រកាសថ្មី ត្រូវបម្រើប្រជាពលរដ្ឋឲ្យបានល្អប្រសើរ ដោយក្នុងអាណត្តិទី៦នេះ រាជរដ្ឋាភិបាលកំពុងផ្ដោតទៅលើការអនុវត្តនូវអភិក្រមទាំង៥ មានដូចជា ងូតទឹក ដូសក្អែល ឆ្លុះកញ្ចក់ ព្យាបាល វះកាត់ ហើយយើងម្នាក់ៗសុទ្ធតែបានដឹង និងបានលឺហើយ។
លោកអភិបាលរាជធានីភ្នំពេញ បានបន្ថែមថា មកដល់ពេលនេះ គ្មាននរណាម្នាក់អាចគេចផុតពីការអនុវត្តលើកំណែទម្រង់ស៊ីជម្រៅ ជាពិសេសលើការអនុវត្តនូវអភិក្រមទី៥នេះទេ។ ដូច្នេះទេមន្ត្រីដែលមានសមត្ថភាព និងចំណេះដឹង ត្រូវផ្លាស់ប្ដូរនូវឥរិយាបទ ខិតខំអនុវត្តតួនាទី ភារកិច្ចស្នូល ដើម្បីបម្រើសេវាជូនប្រជាពលរដ្ឋ ឲ្យបានកាន់តែល្អប្រសើរឡើងថែមទៀត។
លោក ឃួង ស្រេង ក៏បានបញ្ជាក់ផងដែរថា ការប្រកាសតែងតាំងតំណែង អភិបាល នៃគណៈអភិបាលខណ្ឌ៣រូប ដែលមាន២រូបជាអភិបាលខណ្ឌថ្មី គឺមិនទាន់មានត្រានៅឡើយទេ ដោយគ្រាន់តែប្រកាសឲ្យដឹងខ្លួនឯង ដើម្បីត្រៀមលក្ខណៈធ្វើជាអភិបាលខណ្ឌ ពោលគឺក្រោយប្រកាសក្រុមប្រឹក្សាខណ្ឌ រាជធានីទើប ក្រសួងមហាផ្ទៃ ប្រគល់ត្រាដើម្បីគ្រប់គ្រងរដ្ឋបាលបម្រើសេវាជូនប្រជាពលរដ្ឋ ហើយអ្វីដែលត្រូវធ្វើនៅពេលនេះ គឺត្រូវឆ្លងទៅអភិបាលខណ្ឌ ដែលបំបែកចេញ ដូចជាអភិបាលខណ្ឌកំបូល ក្នុងអំឡុងពេលនេះត្រូវឆ្លងជាមួយអភិបាលខណ្ឌពោធិ៍សែនជ័យ ខណ្ឌបឹងកេងកង ត្រូវឆ្លងទៅអភិបាលខណ្ឌចំការមនជាដើម ។
សូមបញ្ជាក់ថា ខណ្ឌទាំង១៤ របស់រាជធានីភ្នំពេញ រួមមានដូចខាងក្រោម ៖
១. ខណ្ឌ ចំការមន
២. ខណ្ឌ ដូនពេញ
៣. ខណ្ឌ ៧មករា
៤. ខណ្ឌ ទួលគោក
៥. ខណ្ឌ ដង្កោ
៦. ខណ្ឌ មានជ័យ
៧. ខណ្ឌ ឫស្សីកែវ
៨. ខណ្ឌ សែនសុខ
៩. ខណ្ឌ ពោធិ៍សែនជ័យ
១០. ខណ្ឌ ច្បារអំពៅ
១១. ខណ្ឌ ជ្រោយចង្វារ
១២. ខណ្ឌ ព្រែកព្នៅ
១៣. ខណ្ឌ បឹងកេងកង (ទើបបង្កើតថ្មី)
១៤. ខណ្ឌ កំបូល (ទើបបង្កើតថ្មី) ៕