រាជធានីភ្នំពេញ ៖ ករណីអគ្គីភ័យមួយ បានឆាបឆេះហាងដូមីណូភីហ្សា ព្រមទាំងបង្គោលភ្លើង និងគ្រឹះស្ថានមីក្រូហិរញ្ញវត្ថុ អេស៊ាផេស៊ីហ្វិក ហ្វាយនែន ភីអិលស៊ី បានបណ្តាលអោយស្ត្រីជាម្តាយ និងកូនម្នាក់ ដែលជាប់នៅក្នុងគ្រឹះស្ថានមីក្រូហិរញ្ញវត្ថុនោះរងរបួសធ្ងន់ ត្រូវបានគេដឹកយកទៅសង្គ្រោះនៅមន្ទីរពេទ្យផងដែរ ។
ហេតុការណ៍គ្រោះអគ្គិភ័យនេះ បានកើតឡើងនៅម៉ោង១និង៥៧នាទីរសៀល ថ្ងៃទី២២ ខែមេសា ឆ្នាំ២០១៩ នៅហាង Domino’s Pizza និងគ្រឹះស្ថានមីក្រូហិរញ្ញវត្ថុ អេស៊ា ផេស៊ីហ្វិក ហ្វាយនែន ភីអិលស៊ី ដែលស្ថិតនៅតាមបណ្តោយផ្លូវ៥១៦ កែងផ្លូវ៣១៥ ទល់មុខផ្សារ TK ទួលគោក ក្នុងសង្កាត់បឹងកក់១ ខណ្ឌទួលគោក ។
គិតមកត្រឹមវេលាម៉ោងនៅវេលាម៉ោង០៣និង២០នាទីរសៀលថ្ងៃដដែលនេះ កម្លាំងសមត្ថកិច្ចជំនាញ ធ្វើការអន្តរាគមន៍បាញ់ទឹកពន្លត់ឲ្យរលត់ទាំងស្រុងហើយ ។
គ្រោះអគ្គីភ័យនេះបណ្តាលឱ្យរងការខូចខាតអគារហាងដូមីណូភីហ្សាអស់មួយចំហៀង និងអគារគ្រឹះស្ថានមីក្រូហិរញ្ញវត្ថុអេស៊ា ផេស៊ីហ្វិក ហ្វាយនែន ភីអិលស៊ី បានរងការខូចខាតអស់មួយចំហៀងផ្នែកខាងកើត និងបណ្តាលឲ្យមនុស្សចំនួន២នាក់ រងរបួសធ្ងន់(មិនស្គាល់អត្តសញ្ញា) ត្រូវដឹកយកទៅសង្គ្រោះបន្ទាន់នៅឯមន្ទីរពេទ្យភ្លាមៗ ។
បើតាមសន្តិសុខដែលយាមនៅមុខហាងភីហ្សា ដូមីណូ បានអះអាងថា មានការឆ្លងចរន្តអគ្គិសនី ចេញពីក្រោយគ្រឹះស្ថានមីក្រូហិរញ្ញវត្ថុដែលនៅក្បែរគ្នា ហើយក៏បានបង្កជាអគ្គីភ័យឆេះនៅហាង Domino’s Pizza ហើយអគ្គិភ័យនេះ បានឆាបឆេះរាលដាលទៅគ្រឹះស្ថានមីក្រូហិរញ្ញវត្ថុនោះវិញ និងឆេះរាលដាលបន្តទៅបង្គោលភ្លើងនៅមុខហាងយ៉ាងសន្ធោរសន្ធៅតែម្តង ។
ទោះជាយ៉ាងណា លោកឧត្តមសេនីយ៍ទោ ហួត ចាន់សារ៉ាន់ ស្នងការរងនគរបាលរាជធានីភ្នំពេញ មិនទាន់អាចបញ្ជាក់ច្បាស់នៅឡើយទេ សម្រាប់មូលហេតុទាក់ទិននឹងអគ្គិភ័យកើតឡើងខាងលើនេះ ព្រោះសមត្ថកិច្ចកំពុងបន្ដស្រាវជ្រាវ នៅឡើយ ៕