សៀមរាប ៖ កម្លាំងនគរបាលព្រហ្មទណ្ឌកំរិតស្រាល នៃស្នងការដ្ឋានខេត្តសៀមរាប បានធ្វើការឃាត់ខ្លួនស្ត្រី២នាក់ ករណីលូកហោប៉ៅភ្ញៀវទេសចរណ៍ ជាតិនិងអន្តរជាតិ នាយប់ថ្ងៃចូលឆ្នាំថ្ងៃទី១ គឺថ្ងៃទី១៤ ខែមេសា ឆ្នាំ២០១៩ នៅតំបន់ផប់ស្ត្រីត ក្នុងភូមិមណ្ឌល១សង្កាត់ស្វាយដង្គំ ក្រុងសៀមរាប ។
លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋានខេត្តសៀមរាប បានឲ្យដឹងថា កម្លាំងលោកបានធ្វើការឃាត់ខ្លួន ជនសង្ស័យចំនួន០២នាក់ ដែលមានឈ្មោះ ផល ស្រីលក័ ភេទស្រីអាយុ២៧ឆ្នាំ នៅសង្កាត់បឹងកក់ ខណ្ឌទួលគោក រាជធានីភ្នំពេញ និងឈ្មោះ ចិត្ត ឆៃវ៉ាន់ ភេទស្រី អាយុ៣១ឆ្នាំ នៅភូមិខ្នា សង្កាត់ជ្រាវ ក្រុង ខេត្តសៀមរាប ករណីលួចមិនបានសម្រេច គឺលូកហោប៉ាវភ្ញៀវទេសចរណ៍ជាតិនិងអន្តរជាតិ ។
លោកបន្តថា នៅថ្ងៃទី១៤ ខែមេសា ឆ្នាំ ២០១៩ ជនសង្ស័យទាំងពីរនាក់ខាងលើបានធ្វើសកម្មភាពលូកកាបូបប្រជាពលរដ្ឋនៅតំបន់ផាប់ស្ទ្រីត ដែលកំពុងតែដើរលេងបាញ់ទឹកយ៉ាងសប្បាយ ប៉ុន្តែមិនទាន់បានធ្វើសកម្មភាពលូកយកបានផង ត្រូវកម្លាំងមានសមត្ថកិច្ចយើងធ្វើការចាប់ខ្លួន បានមុនទាន់ពេលវេលាយកមកធ្វើការសាកសួរ ។
ក្រោយពីសាកសួរជនសង្ស័យទាំងពីរខាងលើបានឆ្លើយសារភាពថា ខ្លួនពិតជាមានបំណងមកធ្វើសកម្មភាពលួចមែននៅវេលាម៉ោង២១និង៣០នាទី និងវេលាម៉ោង២៣និង៣០នាទី តែលួចមិនបាន ក៏ត្រូវសមត្ថកិច្ចចាប់ខ្លួនបានតែម្តង ។
បច្ចុប្បន្នកម្លាំងនគរបាលជំនាញកំពុងកសាងសំណុំរឿងដើម្បីបញ្ជូនខ្លួនជនសងង្ស័យទាំង២នាក់ទៅតុលាការដើម្បីចាត់ការបន្តតាមផ្លូវច្បាប់ ៕
