ខេត្តក្រចេះ ៖ នៅព្រឹកថ្ងៃទី១១ ខែមេសា ឆ្នាំ២០១៩ កម្លាំងប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងស្រែ បានឃាត់ខ្លួនជនជាតិវៀតណាមម្នាក់ជាបណ្តោះអាសន្ន បន្ទាប់ពីបង្កជម្លោះជាមួយមន្ត្រីគយ ដែលប្រចាំការនៅច្រកទ្វារព្រំដែនអន្តរជាតិត្រពាំងស្រែ ។
សមត្ថកិច្ចបានឲ្យដឹងថា ជនជាតិវៀតណាមម្នាក់នេះ មានឈ្មោះ ចិន មិញខាញ់ ភេទប្រុស អាយុ៣២ឆ្នាំ ទីលំនៅ ឃុំស៊ុនថាញ់ ស្រុកស៊ុនឡុក ខេត្តដុងណាយ ប្រទេសវៀតណាម មានមុខរបរត់ម៉ូតូឌុបក្នុងតំបន់ព្រំដែន និងបានដឹកទំនិញតាមម៉ូតូរ៉ឺម៉កតូចមួយ ក្នុងទិសដៅចេញពីប្រទេសកម្ពុជាទៅវៀតណាម លុះមកដល់បារ៉ាស់ត្រួតពិនិត្យ ជនជាតិវៀតណាមរូបនេះ បានបងជម្លោះជាមួយមន្ត្រីគយ ដែលប្រចាំការនៅច្រកទ្វារព្រំដែន រហូតឈានដល់ទាញយកពូថៅគំរាមកាប់ថែមទៀត ឃើញករណីជាក់ស្តែង កម្លាំងប៉ុស្តិ៍នគរបាលកម្ពុជា បានធ្វើការឃាត់ខ្លួនភ្លាមៗ រង់ចាំការដោះស្រាយបន្ត ។
រហូតដល់ម៉ោង១រសៀលថ្ងៃដដែល កម្លាំងយោធាការពារព្រំដែនវៀតណាម៨០១មួយក្រុម បានស្នើសុំធ្វើការសម្របសម្រួល ។ យោងតាមការស្នើសុំពីភាគីមិត្តវៀតណាម ដោយមានការធ្វើលិខិតធានា និងឲ្យសាម៉ីខ្លួនធ្វើកិច្ចសន្យាទទួលកំហុស និងមានការសុំអភ័យទោស កម្លាំងនគរបាលប៉ុស្តិ៍ ក៏បានអនុញ្ញាតឲ្យសាម៉ីខ្លួន ត្រឡប់ទៅប្រទេសវៀតណាមវិញបាត់ទៅ ៕
