រាជធានីភ្នំពេញ ៖ កម្លាំងនគរបាលដឹកនាំដោយលោកឧមត្តមសេនីយ៍ ស ថេត ស្នងការនគរបាលរាជធានី បានចុះបង្ក្រាបទីតាំងក្លិបកម្សាន្តមួយកន្លែងយីហោម៉ៃអាមី ឃាត់ខ្លួនយុវជនប្រមាណ៥០នាក់ ក្នុងនោះមានស្ត្រី១២នាក់ សង្ស័យពាក់ព័ន្ធការជួញដូរ និងប្រើប្រាស់គ្រឿងញៀន និងដកហូតបានថ្នាំញៀនមួយចំនួនផងដែរ ។
ក្លឹបកម្សាន្តយីហោ«ម៉ៃអាមី»មានទីតាំងនៅតាមបណ្តោយផ្លូវ៣៦០ ស្ថិតក្នុងសង្កាត់បឹងកេងកងទី១ ខណ្ឌចំការមន កាលពីវេលាម៉ោង២រំលងអធ្រាត្រឈានចូលថ្ងៃទី១១ខែមេសា ឆ្នាំ២០១៩។
ទីតាំងខាងលើកម្លាំងអាជ្ញាធរបានចុះហាមឃាត់ចំនួន៣ដងមកហើយ ថែមទាំងបិទលែងឱ្យដំណើរការទៀតផង តែមិនបានប៉ុន្មានផងក៏បើកវិញ រហូតមកដល់យប់ឈានចូលថ្ងៃ១១ខែមេសានេះទើបពេលនេះលោកឧត្តមសេនីយ៍ផ្កាយ៣ ស ថេត ដឹកនាំកម្លាំងស្នងការនគរបាលរាជធានីចុះបង្ក្រាបដោយផ្ទាល់តែម្តង។
នៅព្រឹកថ្ងៃទី១១ ខែមេសា ឆ្នាំ២០១៩នេះ មន្ត្រីសមត្ថកិច្ចបានប្រាប់អោយដឹងថា យុវជនប្រមាណ៥០នាក់ ត្រូវបានឃាត់ខ្លួននៅក្នុងប្រតិបត្តិការចុះបង្ក្រាបនៅក្នុងក្លឹបកម្សាន្ត«ម៉ៃអាមី» កាលពីយប់មិញ កម្លាំងជំនាញកំពុងសួរនាំនៅ នៅស្នងការដ្ឋាននគរបាលរាជធានីភ្នំពេញ ដើម្បីចាត់វិធានការទៅតាមនីតិវិធីច្បាប់ ។ តាមការសន្និដ្ឋានជាជំហ៊ានដំបូងរបស់សមត្ថកិច្ច ថា នៅក្នុងចំណោមយុវជនទាំង៥០នាក់ដែលត្រូវបានចាប់ខ្លួននេះ គឺមានពាក់ព័ន្ធនឹងគ្រឿងញៀនភាគច្រើន ព្រោះសមត្ថកិច្ចបានរកឃើញឧបករណ៍ប្រើប្រាស់សម្រាប់បម្រើការជក់ថ្នាំញៀនមួយចំនួនធំផងដែរ ។
ទោះជាយ៉ាងនេះក្តី ថៅកែក្លឹបកម្សាន្ត ម៉ៃអាមី មិនត្រូវបានប៉ូលិសអះអាងថា ត្រូវបានចាប់ខ្លួន ឬក៏យ៉ាងណានោះទេ ។ យ៉ាងណាប្រជាពលរដ្ឋសំណូមពរដល់សមត្ថកិច្ចចាប់ខ្លួនថៅកែក្លឹបកម្សាន្ត ម៉ៃអាមី ដើម្បីផ្តន្ទាទោសអោយដូចថៅកែក្លឹបកម្សាន្តរ៉ុក របស់លោកឧកញ៉ា គិត ធាង ផងដែរ ៕