រដ្ឋមន្ត្រីក្រសួងសាធារណការនិងដឹកជញ្ជូន កម្ពុជា.ថៃ ចុះពិនិត្យទីតាំងរៀបចំសម្ភោធស្ពានអន្តរជាតិស្ទឹងបត់និងបើកការដ្ឋានសង់ផ្លូវតភ្ជាប់ពីស្ពានទៅផ្លូវជាតិលេខ៥
ខេត្តបន្ទាយមានជ័យ ៖ ផ្លូវដែកមួយខ្សែដែលតភ្ជាប់រវាងប្រទេសកម្ពុជា និងប្រទេសថៃ ដែលត្រូវបានរងការខូចខាត ដោយសារសង្គ្រាម អស់រយៈពេល៤៥ឆ្នាំ កន្លងមកហើយនោះ នឹងត្រូវបានភ្ជាប់ដំណើរការឡើងវិញ នាថ្ងៃទី២២ ខែមេសា ឆ្នាំ២០១៩ ខាងមុខនេះនៅពេលដែលសម្តេចតេជោ ហ៊ុន សែន ទទួលទូរថភ្លើង ដែលភាគីថៃបានផ្តល់ឱ្យនោះ នឹងមានការចុះហត្ថលេខាលើកិច្ចព្រមព្រៀងការដឹកជញ្ជូនតាមផ្លូវដែកតែម្តង ។
រដ្ឋមន្ត្រីក្រសួងសាធារណការ និងដឹកជញ្ជូន កម្ពុជា និងថៃ បានចុះពិនិត្យរួមគ្នា ទីតាំងរៀបចំសម្ភោធស្ពានអន្តរជាតិស្ទឹងបត់ និងបើកការដ្ឋានសង់ផ្លូវតភ្ចាប់ពីចំណុចស្ពានអន្តរជាតិស្ទឹងបត់មកផ្លូវជាតិលេខ៥ នៅថ្ងៃទី០៨ ខែមេសា ឆ្នាំ ២០១៩ នៅលើស្ពានអន្តរជាតិស្ទឹងបត់ ក្នុងភូមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត ។
ក្នុងកិច្ចជំនួបរវាងឯកឧត្តម ស៊ុន ចាន់ ថុល ទេសរដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តម អាឃុំទើម ធីផៃសិត រដ្ឋមន្ត្រីក្រសួងសាធារណការ និងដឹកជញ្ជូនថៃ បានពិភាក្សារៀបចំទីតាំងដើម្បីដាក់សម្ភោធស្ពានអន្តរជាតិស្ទឹងបត់ និងបើកការដ្ឋានសាងសង់ផ្លូវតភ្ជាប់ពីស្ពានអន្តរជាតិស្ទឹងបត់មកផ្លូវជាតិលេខ៥ ។
ឯកឧត្តមទេសរដ្ឋមន្ត្រី ស៊ុន ចាន់ថុល មានប្រសាសន៍ថា ស្ពានព្រំដែនច្រកទា្វរអន្តរជាតិស្ទឹងបត់ដែលតភ្ចាប់រវាងប្រទេសថៃ និងកម្ពុជា ត្រូវបានសាងសង់ឡើងដោយវិស្វកម្មភាគីថៃទាំងស្រុងតែម្តង ដែលមានប្រវែង៦០៥ម៉ែត្រ ដែលខាងភាគីកម្ពុជា មានប្រវែង២១៥ម៉ែត្រ និងទទឹង១៧ម៉ែត្រ ដោយខាងភាគីថៃ ជាអ្នកចំណាយផងដែរ ។
ឯកឧត្តម ទេសរដ្ឋមន្ត្រី បញ្ជាក់ថា ការចុះមករវាងភាគីទាំងពីរនៅថ្ងៃនេះ គឺដើម្បីរៀបចំរាល់នីតិវិធីអោយគ្រប់ជ្រុងជ្រោយទាំងអស់ ដើម្បីអប់អរសាទរពិធីសម្ភោធស្ពានអន្តរជាតិស្ទឹងបត់នេះ និងពិនិត្យរកទីតាំងដើម្បីសាងសង់អគារស្នាក់ការត្រួតពិនិត្យ រួមទាំងបើកការដ្ឋានសាងសង់ផ្លូវតភ្ចាប់ពីស្ពានទៅកាន់ផ្លូវជាតិលេខ៥ ដែលសម្តេចនាយករដ្ឋមន្ត្រីតេជោហ៊ុន សែន និងនាយករដ្ឋមន្ត្រីថៃ និងអញ្ជើញជាគណធិបតេយ្យនៅថ្ងៃទី២២ ខែមេសា ឆ្នាំ ២០១៩ ខាងមុខនេះ ។
ឯកឧត្តមទេសរដ្ឋមន្ត្រី ស៊ុន ចាន់ថុល បញ្ជាក់ទៀតថា ច្រកទ្វារព្រំដែន អន្តរជាតិស្ទឹងបត់នេះ សំរាប់ការដឹកទំនិញចេញចូលឆ្លងកាត់រវាងប្រទេសទាំងពីរ និងច្រកទ្វារអន្តរជាតិប៉ោយប៉ែតគឺសំរាប់ភ្ញៀវទេសចរណ៍ចេញចូល។ ការដឹកជញ្ជូនតាមផ្លូវដែកនេះ ពិតជាមានសារសំខាន់ណាស់ ព្រោះវាអាចជួយកាត់បន្ថយការខូចខាតផ្លូវថ្នល់ផង និងអាចដឹកទំនិញបានច្រើនផងដែរ ក្នុងនោះដែរ កម្មករ កម្មការិនី ក៏អាចធ្វើដំណើរពីបាងកក មកដល់ស្ថានីយ៍ប៉ោយប៉ែតនេះផងដែរ ព្រោះនេះ គឺជាស្ថានីយរថភ្លើងលំដាប់ថ្នាក់អន្តរជាតិ ៕
