រាជធានីភ្នំពេញ ៖ នៅសៀលថ្ងៃ០៨ ខែមេសា ឆ្នាំ២០១៩នេះ សមត្ថកិច្ចបានបញ្ជូនជនសង្ស័យម្នាក់ឈ្មោះ HOFER PETER អាយុ៦៤ឆ្នាំ ជនជាតិស្វីស ទៅកាន់តុលាការ ពាក់ពន្ធ័ករណីឆបោកបន្លំក្រដាស់ប្រាក់ដុល្លារក្លែងក្លាយប្រភេទ១០០ដុល្លារ នៅទូ ATM ធនាគារ ABA ក្នុងខណ្ឌដូនពេញ រាជធានីភ្នំពេញ ។
ជនសង្ស័យ ស្នាក់នៅផ្ទះសំណាក់ Velkommen ផ្ទះលេខ១៧ ផ្លូវលេខ១៤៤ ភូមិ៥ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។
សូមបញ្ជាក់ថា ករណីបន្លំក្រដាស់ប្រាក់ដុល្លារក្លែងក្លាយនេះបានកើតឡើងកាលពីថ្ងៃទី០៦ ខែមេសា ឆ្នាំ២០១៩ វេលាម៉ោង០៩និង៣០នាទី នៅចំណុចទូ ATM ធនាគារ ABA ទីតាំងផ្ទះលេខ ៦៨ផ្លូវលេខ៥៣ កែងផ្លូវលេខ១៣៦ ភូមិ១ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ។
វត្ថុតាងចាប់យកបានលុយក្រដាស់ ១០០ដុល្លារក្លែងក្លាយចំនួន០១សន្លឹក លុយដុល្លារចំនួន១១៦ដុល្លារ និងលុយថៃចំនួន៥២៤០បាត លុយខ្មែរចំនួន២ម៉ឺនរៀល, លិខិតឆ្លងដែន១ក្បាល, ទូរស័ព្ទដៃម៉ាក Xiami ពណ៌ខ្មៅចំនួន១, វ៉ែនតាចំនួន២, ថ្នាំពេទ្យមួយចំនួន, កាត ATM ចំនួន៤, កាតសំគាល់ខ្លួនចំនួន៣, ប្រអប់ដាក់កាតចំនួន១, ប័ណ្ណបើកបរអន្តរជាតិចំនួន១, កាបូបស្ពាយពណ៌ខ្មៅចំនួន១ (ជារបស់ជនសង្ស័យ) ។
សូមរម្លឹកថា កាលពីវេលាម៉ោង៩និង៣០នាទីនៅថ្ងៃទី៦ មេសា ជនសង្ស័យបានមកធ្វើការដកលុយពីទូ ATM ក្នុងធនាគារ ABA ដែលមានទីតាំងផ្ទះលេខ៦៨ ផ្លូវលេខ១៣៦ កែងផ្លូវ៥៣ ភូមិ១ សង្កាត់ផ្សារថ្មី៣ ខណ្ឌដូនពេញ ។ ពេលធ្វើសកម្មភាពនោះ ជនសង្ស័យបានដកលុយចំនួន១០០$ ចេញពីទូ ATM បានហើយក៏យកលុយ១០០ដុល្លារនោះ មកបង្ហាញដល់បុគ្គលិកធនាគារ ហើយបានប្រាប់ថា ជាលុយក្លែងក្លាយ ពេលនោះបុគ្គលិកធនាគារបានពិនិត្យលុយក្លែងក្លាយនោះ និងនិយាយប្រាប់ជនសង្ស័យថា ចាំជួយឆែកមើលរឿងនេះឲ្យ និងឲ្យជនសង្ស័យត្រឡប់ទៅវិញសិន ចាំល្ងាចម៉ោង៣ ចាំមកដោះស្រាយជូន ។
ពេលនោះជនសង្ស័យក៏បានចេញទៅបាត់ទៅ បន្ទាប់មកជនរងគ្រោះបានត្រួតពិនិត្យ និងឆែកកាម៉េរ៉ាសុវត្ថិភាពមើលទើបដឹងថា ជនសង្ស័យលួចបន្លំយកលុយក្រដាស់ ១០០ដុល្លារក្លែងក្លាយ ចេញពីកាបូបស្ពាយពណ៌ខ្មៅ មកកាន់បន្លំបង្ហាញបុគ្គលិកធនាគារ ABA ថា ជាលុយដុល្លារដែលដកបានពី ATM នោះជាលុយដុល្លារក្លែងក្លាយរហូតដល់ម៉ោង ១៥និង០០នាទី ក៏ជនសង្ស័យត្រលប់មកវិញ ហើយជនរងគ្រោះបានធ្វើការសួរនាំ និងបើកឲ្យមើលកាម៉េរ៉ាសុវត្ថិភាព ទើបជនសង្ស័យបានសារភាពថា ខ្លួនពិតជាមកធ្វើការបន្លំពិតប្រាកដមែន ។
ក្រោយកើតហេតុ បុគ្គលិកធនាគារបាននាំខ្លួនជនសង្ស័យ និងវត្ថុតាងលុយ១០០ដុល្លារ ក្លែងក្លាយយកមកប្រគល់ជូនកម្លាំងនគរបាលប៉ុស្តិ៍រដ្ឋបាលផ្សារថ្មីទី៣ ដើម្បីធ្វើការសាកសួរដើម្បី កសាងសំណុំរឿងបញ្ជូនទៅតុលាការចាត់ការតាមនីតិវិធី៕