ហ្វេសប៊ុក ៖ មួយរយៈកន្លងមកនេះ ការប្រមូលសំរាមសម្អាតនៅលូទឹកស្អុយ បឹងត្របែករបស់យុវជនមួយក្រុម ត្រូវបានទទួល ការសរសើរពីសំណាក់អ្នកលេងបណ្តាញសង្គម ក៏ដូច ជាត្រូវបានអាជ្ញាធរមើលឃើញនឹងចុះមកសហការជួយប្រមូលសំរាមទាំងនោះ ផងដែរ ។ ប៉ុន្តែយុវជនស្ម័គ្រចិត្តប្រមូលសំរាម នៅម្តុំប្រលាយបឹងត្របែក ក៏ដូចជាសាលារាជធានី បានប្រើគ្រឿងចក្រដើម្បីទៅកើបសំរាមរាប់តោន តែនៅតែមិនចេះអស់សោះ សំរាមនៅតែមានដដែល ជាដដែល ។ តើជារៀងរាល់ថ្ងៃ ពួកគាត់ក៏ដូចអាជ្ញាធរត្រូវធ្វើការបែបនេះជាប្រចាំឫ ?
ជាក់ស្តែង នៅយប់ថ្ងៃទី១៨ ខែមីនា ឆ្នាំ២០១៩ ក្រុមការងាររដ្ឋបាលខណ្ឌចំការមន បានឃ្លាំចាំមើល ប្រជាពលរដ្ឋនៅក្បែរតំបន់នោះ បានបោះចោលសំរាមនៅតាមមាត់ប្រឡាយបឹងត្របែក អាជ្ញាធរនឹងអប់រំណែនាំ និងឲ្យអ្នកទាំងនោះធ្វើកិច្ចសន្យាអោយបញ្ឈប់ការបោះចោលសំរាមតាមទីសាធារណ: ។
បើតាមប្រភពពីផេកហ្វេសប៊ុក Global Picture បានសរសេរបញ្ជាក់ថា «ឲ្យរាងកុំចេះតែហ៊ាន !! ប្រមូលសំរាមមិនចេះអស់ ឥឡូវរដ្ឋបាលខណ្ឌចំការមន បានចាត់កម្លាំងឃ្លាំមើលឃាត់ជនប្រុសស្រីដែលបោះចោលសំរាម នៅតាមបណ្ដោយប្រឡាយលូទឹកស្អុយ ផ្លូវ១០៥ បានប្រមាណ១០នាក់ ដោយធ្វើការណែនាំអោយពួកគាត់ បញ្ឈប់ការយកសំរាមមកបោះចោល តាមទីតាំងខាងលើនេះទៀត និងត្រូវវេចខ្ចប់ ទុកដាក់តាមផ្ទះរៀងខ្លួនអោយបានត្រឹមត្រូវដើម្បីស៊ិនទ្រីមកដឹកចេញ» ។
សរុបមក ក្រុមយុវជនស្ម័គ្រចិត្ត និងសាលារាជធានី មិនចាំបាច់ធ្វើការនេះ រាល់ថ្ងៃទេ បើ បុគ្គលមួយចំនួនតូច បញ្ឈប់ការបោះចោលសំរាមពាសវាលពាសកាលបែបនេះ ពិសេសតាមប្រលាយលូបឹងត្របែក ៕