ប្រទេសវៀតណាម ៖ បើគ្មានអ្វីប្រែប្រួលទេ ប្រធានាធិបតីអាមេរិកលោក ដូណាល់ ត្រាំ នឹងជួបមេដឹកនាំកូរ៉េខាងជើង លោក គីម ជុងអ៊ុន នឹងជួបគ្នាក្នុងជំនួបកំពូលលើកទី២ នាល្ងាចថ្ងៃពុធស្អែកនេះ ដែលអន្តរជាតិកំពុងតែចាប់អារម្មណ៍យ៉ាងខ្លាំង ។
ក្រោយការធ្វើដំណើររយៈពេល៣ថ្ងៃ ក្នុងចម្ងាយផ្លូវជិត១៧០គីឡូម៉ែត្រ រថភ្លើងរបស់មេដឹកនាំលោក គីម ជុងអ៊ុន បានមកដល់ ទឹកដីវៀតណាមហើយ នៅព្រឹកថ្ងៃទី២៦ ខែកុម្ភៈ ។
លោក គីម ជុងអ៊ុន បានទៅដល់ស្ថានីយ៍រថភ្លើង Dong Dang ខេត្ត Lang son ប្រទេសវៀតណាម នៅវេលាម៉ោង៨និង១០នាទីព្រឹក ថ្ងៃនេះ ដោយមានមន្ត្រីជាន់ខ្ពស់វៀតណាមជាច្រើនរូប និងប្រជាជនវៀតណាម ចាំទទួលស្វាគមន៍ ។ ក្រោយចុះពីរថភ្លើង លោកគីម ជុងអ៊ុន បានឡើងទៅលើរថយន្ត ដោយមានកងអង្គរក្ស១២នាក់ អមការពារ បន្តដំណើរទៅកាន់ទីក្រុង ហាណូយ ។
នៅពេលនេះដែរ ប្រធានាធិបតីអាមេរិក លោកត្រាំ បានឡើងយន្តហោះ ដ៏ទំនើបរបស់ខ្លួន កាលពីរសៀលថ្ងៃទី២៥ ខែកុម្ភៈ ឆ្ពោះទៅកាន់ប្រទេសវៀតណាម ត្រូវបានគេរំពឹងថា នឹងទៅដល់ប្រទេសវៀតណាមនៅល្ងាច ឬក៏យប់ថ្ងៃអង្គារនេះហើយ ។
សូមបញ្ជាក់ថា មេដឹកនាំប្រទេសទាំងពីរ ធ្លាប់បានជួបគ្នាមួយដងរួចមកហើយ កាលពីខែមិថុនា ឆ្នាំ២០១៨ នៅក្នុងប្រទេសសិង្ហបុរី ។ កាលជំនួបលើកទី១នោះ ភាគីទាំងពីរមិនទាន់យល់ស្រប ទៅលើបញ្ហាជាច្រើន ទាក់ទងនឹងការរំសាយអាវុធនុយក្លេអ៊ែរ ហើយនិងការធានាសុវត្ថិភាពរបស់កូរ៉េខាងជើង រហូតមកដល់ពេលនេះ ក៏មានការជំនួបប្រជុំកំពូលជាលើកទី២ នៅទីក្រុងហាណូយ ប្រទេសវៀតណាម ថ្ងៃទី២៧ និងថ្ងៃទី២៨ ខែកុម្ភៈ ឆ្នាំ២០១៩ ៕
