សិល្បៈ៖ ប្រិយមិត្តជាច្រើនច្បាស់ជាបានដឹងហើយថា មួយរយៈចុងក្រោយនេះ តារាក្បាច់គុណ លោក សុខ ដែន កំពុងមមាញឹកខ្លាំងក្នុងការចេញថតភាពយន្ត និង MV ប៉ុន្តែយ៉ាងណាមិញ លោកនៅតែអាចឆ្លៀតពេលខ្លះ ដើម្បីផលិតបទចម្រៀង Original ផ្ទាល់ខ្លួន ក្នុងនោះមានទាំងបទញាក់កន្ត្រាក់អារម្មណ៍ មនោសញ្ចេតនា និង បទប្រពៃណីខ្មែរជាដើម ។
ជាក់ស្ដែងកាលពីពេលថ្មីៗនេះ បន្ទាប់ពីស្ងប់ស្ងាត់ធ្វើបទចម្រៀងមួយរយៈ លោក សុខ ដែន ក៏បានបញ្ចេញបទចម្រៀង និពន្ធបទភ្លេងថ្មីមួយបទទៀតមានចំណងជើងថា «សង្សារក្មេង» សម្រាប់រាំលេងកម្សាន្តក្នុងឱកាលបុណ្យចូលឆ្នាំថ្មីប្រពៃណីខ្មែរខាងមុខនេះ ។
ចំពោះបទចម្រៀង «សង្សារក្មេង» គឺជារស់ជាតិថ្មីប្លែក សម្រាប់លោក សុខ ដែន ដោយមានន័យបង្ហាញពីបុរសម្នាក់ មានសង្សារវ័យក្មេង ហើយសង្សារក្មេងរបស់គាត់តែងតែងងក់ ប្រចណ្ឌមិនចេះចប់មិនចេះហើយ ដែលសាច់រឿងនេះ ត្រូវជាមួយសង្គមស្នេហាយុវវ័យបច្ចុប្បន្ន ។
សូមបញ្ជាក់ដែរថា លោក សុខ ដែន ជាតារាសម្ដែងម្នាក់ ដែលវិវឌ្ឍពីអ្នកក្បាច់គុណបុរាណខ្មែរ និង ហ្វ៊ីដូ ។ ឆ្នាំ ១៩៩៧ លោកគឺជាកីឡាករកាយសម្ព័ន្ធ និងជាប់ជាជម្រើសជាតិផ្នែកកាយសម្ព័ន្ធ នៅឆ្នាំ ២០០០ ព្រមទាំងមានឱកាសបានទៅប្រកួតតំណាងជាតិ នៅឆ្នាំ ២០០៦ ។
នៅឆ្នាំ ២០០៦ នោះដែរ សុខ ដែន ក៏មានឱកាសបានចូលប្រឡូកក្នុងសិល្បៈប៉ុន្តែនៅមិនទាន់ពេញលេញនៅឡើយ ដោយនៅជាប់ជាមួយការងារកីឡាករខ្លះៗ រហូតមកដល់ឆ្នាំ ២០០៨ លោកក៏បានចូលប្រឡូកពេញទំហឹងព្រមទាំងបានសម្ដែងក្នុងរឿងជាច្រើនចាប់ពីពេលនោះមកមានដូចជា រឿង «រន្ទះជើងក្នុងភ្លក់ភ្លើងវណ្ណៈ» «បន្ទាប់សង្គ្រៀមកូនភ្លោះ» «ខ្មោចពោះធំ» «រង្គសាលពិឃាត» «ល្បុកតោចម្លែក» «លត់ដែកថែប» «ហ្លួងព្រះស្ដេចព្រះកន» «ខ្មោចស៊ីឈ្នួល» «កំពូលអ្នកស៊ើបអង្កេត» ។
ក្រៅពីថតភាពយន្តនៅមានថត MV ជាច្រើនទៀត ដូចជាបទ «ប្រពន្ធរត់ចោល» បានធ្វើឱ្យលោកទទួលបានភាពជោគជ័យយ៉ាងខ្លាំង ហើយសម្រាប់ការសម្ដែងក្នុងបទនេះដែរ គែបន្ទាប់ពីលោកឈប់សម្រាករយៈពេល ៣ឆ្នាំ ទៅបម្រើការងាររាជការ ៕
សហការី KBN
