ស្ត្រីអ្នកគ្រប់គ្រងហាងកែសម្ផស្សម្នាក់ និងស្វាមីបានធ្វើទារុណកម្មមកលើអ្នកបម្រើស្រីម្នាក់ជនជាតិមីយ៉ាន់ម៉ា ដោយបង្ខំឱ្យនាងធ្វើការ បង្អត់អាហារ ប្រើហិង្សា រួមទាំងចាក់ទឹកក្តៅលើខ្លួននាង និងបង្ខំឲ្យផឹកទឹកកខ្វក់(ទឹកជូតផ្ទះ) លាយជាមួយម្សៅសាប៊ូ ។
ស្ត្រីអ្នកគ្រប់គ្រងហាងសាឡនមួយ នៅផ្សារទំនើប គឺអ្នកស្រី លីនដា សៀរលីស៊ី អាយុ៣៩ឆ្នាំ ត្រូវបានផ្តន្ទាទោសឱ្យជាប់គុក០៣ឆ្នាំ កាលពីថ្ងៃទី១១ កុម្ភៈ ២០១៩ ម្សិលមិញនេះ បន្ទាប់ពីចៅក្រមប្រទេសសិង្ហបុរី រកឃើញថា ស្ត្រីជាប់សង្ស័យ មានពិរុទ្ធពីបទរំលោភបំពាន លើអ្នកបម្រើជនជាតិភូមាម្នាក់ ឈ្មោះ Phyu Phyu Mar ហើយត្រូវបានតុលាការបង្គាប់ឱ្យបង់ប្រាក់សំណងចំនួន ១១,៨០០ដុល្លារសិង្ហបុរី ប្រមាណជា ៨,៦៨៤ ដុល្លារអាមេរិក ផងដែរ ។
លោកចៅក្រម Olivia Low បាននិយាយថា “ការមិនសប្បាយចិត្តរបស់អ្នកស្រីលីនដា ជាមួយការងាររបស់ជនរងគ្រោះ មិនគួរបង្ហាញពីអំពើហឹង្សាប្រឆាំងនឹងជនរងគ្រោះ នោះទេ…” រហូតមកដល់ពេលនេះ នាងនៅតែមានស្នាមរបួស នៅលើស្មាខាងឆ្វេង នៅឡើយ ។
លោកចៅក្រម រកឃើញថា គូស្វាមីភរិយាជនជាតិសឹង្ហបុរី មួយគូនេះ មានពិរុទ្ធពីបទរំលោភបំពានចំនួន៥ករណី ហើយមួយករណី បង្ខំឱ្យស្ត្រីបម្រើ ផឹកទឹកកខ្វក់(ទឹកជូតផ្ទះ)លាយជាមួយម្សៅសាប៊ូ ។
លោកចៅក្រម ថ្លែងថា ប្ដីរបស់អ្នកស្រីលីនដា គឺលោក លីម តូនឡេង អាយុ៤៤ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល០៦សប្ដាហ៍ផងដែរ ។ លោក លីម ត្រូវបានបង្គាប់ឱ្យបង់ប្រាក់ចំនួន៥០០ដុល្លារ ។ ដោយសារតែនៅថ្ងៃទី១៣ ខែតុលា ឆ្នាំ២០១៦ លោក លឹម បានដាល់មុខ នារីអ្នកស្រី ចំនួនពីរដង ខឹងថា នាងបានបោះចោល ស៊ុមរូបថតរបស់គាត់ ។
គូស្វាមីភរិយាជនជាតិសឹង្ហបុរី ដែលមានកូនស្រីម្នាក់ អាយុ០៥ឆ្នាំ បានប្រព្រឹត្តបទល្មើស នៅក្នុងផ្ទះរបស់ពួកគេ ចន្លោះពីខែសីហា ដល់ខែតុលា ឆ្នាំ២០១៦ រហូតមក ។
តុលាការ បានរកឃើញទៀតថា អ្នកបម្រើជនជាតិភូមា នាងមិនបានទទួលប្រាក់បៀវត្ស ប្រចាំខែ ចំនួនជាង៥០០ដុល្លារអាមេរិក អស់រយៈពេលជាយូរខែមកហើយ ។ ហើយទម្ងន់របស់នាង ក៏ធ្លាក់ចុះពី៥០គីឡូក្រាម មកសល់ត្រឹម៣៨គីឡូក្រាម ដោយសារតែខ្វះចំណីអាហារ ។
យ៉ាងណា អ្នកស្រី លីនដា មានបំណងប្តឹងឧទ្ធរណ៍ ប្រឆាំងនឹងការផ្តន្ទាទោសនិងសំណងនេះ ខណៈដែលលោកលឹម ក៏នឹងប្តឹងជំទាស់នឹងការផ្តន្ទាទោសរបស់គាត់ដែរ ៕