ខេត្តបន្ទាយមានជ័យ ៖ មន្ត្រី(ស៊ីម៉ាក់)មជ្ឈមណ្ឌលកម្ចាត់មីនកម្ពុជា បានបំផ្ទុះចោលហើយ នូវគ្រាប់បែកបង្កៃនៅក្នុងកាស៊ីណូហ្គោលដិនក្រោន ក្រុងប៉ោយប៉ែត(ជាប់ផ្លូវរថភ្លើង) ដោយបានប្រើបច្ចេកទេសដាក់សំបកកង់ឡានចាស់ៗជាគំនរជុំវិញគ្រាប់រួចក៏ចុចបំផ្ទុះចោលដោយជោគជ័យ ។
គ្រាប់បង្កៃកំណត់ពេលបំផ្ទុះនេះ គេនៅមិនទាន់ស្គាល់ម៉ាកនៅឡើយទេ ត្រូវបានកម្លាំងជំនាញស៊ីម៉ាក់បំផ្លាញចោល នៅម៉ោងជាង៧និង៣០នាទី យប់ថ្ងៃទី១០ កុម្ភៈ ២០១៩នេះ បន្ទាប់ពីជនសង្ស័យមិនទាន់ស្គាល់មុខលួចបង្កៃក្នុងកាស៊ីណូហ្គោលដិនក្រោន ត្រូវបានបុរសម្នាក់ប្រទះឃើញ កាលពីល្ងាចថ្ងៃខែដដែល ។
គ្រឿងផ្ទុះដែលគេលួចបង្កៃនេះ មានទ្រនិចដើរអាចជាគ្រឿងផ្ទុះកំណត់ពេលវេលា មានខ្សែភ្លើងក្រហម និងខៀវ មានលេខ ជានាទីដើរថយក្រោយ ដាក់ក្នុងប្រអប់ពណ៌សមួយរាងបួនជ្រុងទ្រវែង ។
សូមជម្រាបថា គ្រឿងបំផ្ទុះនោះ ត្រូវបានបុរសម្នាក់ចូលទៅលេងហ្គេម នៅក្នុងកាស៊ីណូខាងលើ ហើយបានចូលក្នុងបន្ទប់ទឹក ស្រាប់តែប្រទះឃើញកញ្ចប់ថង់មួយ រួចហៅសន្ដិសុខកាស៊ីណូមកពិនិត្យ ទើបសង្ស័យថាគ្រាប់បែក និងបង្កការភ្ញាក់ផ្អើលតែម្ដង ។
ក្រោយឃើញយ៉ាងដូច្នេះសន្ដិសុខ បានយកមកបោះចោលនៅមាត់លូ ខាងក្រៅកាស៊ីណូ ទើបហៅសមត្ថកិច្ចមូលដ្ឋាន និងមន្ដ្រីស៊ីម៉ាក់ ចេញមកអន្ដរាគមន៍ ។ នៅម៉ោងជិត៧និង៣០នាទីយប់ថ្ងៃដដែល ខាងជំនាញកម្ចាត់មីនស៊ីម៉ាក់ បានទៅដល់ និងពិនិត្យជាក់ស្តែងដែលមិនអាចទុកយូរបាន គ្រាប់បែកបង្កៃនោះ ត្រូវបានមន្ត្រីជំនាញបំផ្លាញចោលតាមបច្ចេកទេស ដោយដាក់សំបកកង់រថយន្តជាច្រើន ដើម្បីបង្កាអំបែងគ្រាប់ ដោយមិនបង្កបញ្ហាគ្រោះថ្នាក់អ្វីឡើយ គ្រាន់តែប្រេះបែកកញ្ចក់ជញ្ចាំងកាស៊ីណូតែប៉ុណ្ណោះ។ ក្រោយការបំផ្ទុះតាមជំនាញរបស់ក្រុមស៊ីម៉ាក់ក៏មានរថយន្តពន្លត់អគ្គិភ័យ ចាំបាញ់ទឹកចំណុចបំផ្ទុះនោះភ្លាមៗផងដែរ ដើម្បីបង្ការភ្លើងរាលដាល ។
ចំណែកបុរសដែលប្រទះឃើញគ្រឿងផ្ទុះ ក្នុងបន្ទប់ទឹកកាស៊ីណូ ត្រូវបានសមត្ថកិច្ចនាំយកទៅសួរនាំ ប៉ុន្តែគេមិនទាន់ប្រាប់ពីអត្តសញ្ញាណនៅឡើយទេ ។ ចំណែកគ្រឿងផ្ទុះដែលជនមិនស្គាល់មុខលួចបង្កៃ ខាងជំនាញមិនទាន់ប្រាប់ឲ្យដឹងថា ជាប្រភេទអ្វី និងផលិតនៅប្រទេសណានៅឡើយដែរ ៕
