ថៃ ៖ ផ្សែងពុលបានបង្ខំឲ្យអាជ្ញាធរក្រុងបាងកកចេញបទបញ្ជាមិនធ្លាប់មានពីមុនមក ដើម្បីបិទសាលារៀន ៤៣៧ កន្លែង កាលពីថ្ងៃពុធ ខណៈដែលអាជ្ញាធរព្យាយាមគ្រប់គ្រងវិបត្តិការបំពុលមួយ ដែលបានជំរុញឲ្យមានការព្រួយបារម្ភយ៉ាងខ្លាំង ។
ក្រុងបាងកក ជារាជធានីរបស់ប្រទេសថៃ ត្រូវបានគ្របដណ្ដប់ដោយអ័ព្ទដ៏ក្រាស់អស់រយៈពេលជាច្រើនសប្ដាហ៍មកហើយ ដោយបង្ខំឲ្យប្រជាពលរដ្ឋត្រូវពាក់ម៉ាស ។ ដោយសារតែវិបត្តិនេះកើតឡើងរយៈពេលយូរបែបនេះហើយ ទើបមានផ្ទុះជាការរិះគន់យ៉ាងខ្លាំងពីសំណាក់ប្រជាពលរដ្ឋថៃ ទៅកាន់រដ្ឋាភិបាលតាមបណ្តាញសង្គម ។
ហេតុផលដែលគេអះអាងបង្កឡើងជាបញ្ហានេះ គឺរួមមានផ្សែងចេញពីចរាចរណ៍ ការសាងសង់មិនមានភាពរឹងមាំ ការដុតកម្ទេចដំណាំ និងការបំពុលពីរោងចក្រដែលជាប់នៅក្នុងទីក្រុង ។
តែទោះជាយ៉ាងណាក្តី ដើម្បីឆ្លើយតបទៅនឹងបញ្ហាប្រឈមនេះ អាជ្ញាធរបានបង្កើតពពកដើម្បីបង្កឲ្យមានភ្លៀងធ្លាក់ និងបាញ់ទឹកដើម្បីចាប់យកការបំពុលខ្នាតតូច ហើយថែមទាំងបានស្នើសុំឲ្យប្រជាជនកុំអុជធូប និងក្រដាសអំឡុងពិធីបុណ្យចូលឆ្នាំចិន ថែមទៀតផង ។
នៅថ្ងៃពុធទី៣០ មករា ឆ្នាំ២០១៩ អាជ្ញាធរថៃបានប្រកាសបិទទ្វារសាលារដ្ឋទាំងអស់ចំនួន ៤៣៧ កន្លែង ត្រូវបិទទ្វារចាប់ពីរសៀលថ្ងៃពុធនេះ រហូតទៅដល់ថ្ងៃសុក្រ ទី១ កុម្ភៈ ឆ្នាំ២០១៩ ហើយបានកំណត់ផ្ទៃដី១,៥០០គីឡូម៉ែត្រការ៉េ នៃទីក្រុង ជាតំបន់គ្រប់គ្រង ។
អភិបាលក្រុងបាងកកលោក Aswin Kwanmuang បានថ្លែងថា “ស្ថានការណ៍នឹងអាក្រក់រហូតដល់ថ្ងៃទី៣ទៅថ្ងៃទី៤ខែកុម្ភៈដូច្នេះខ្ញុំសម្រេចចិត្តបិទសាលារៀន”។ លោកបានបន្ថែមថា លោកសង្ឃឹមថា វិធានការនេះនឹងមិនមានរថយន្តសាលាធ្វើដំណើរតាមផ្លូវទេ ។ លោកបានបន្តទៀតថា ខណ្ឌចំនួន៣ ក្នុងចំណោម៤របស់ទីក្រុងនេះត្រូវបានរងគ្រោះខ្លាំងដោយផ្សែងអ័ព្ទ។
លោក Aswin ក៏បាននិយាយផងដែរថា សាលាក្រុងបាងកក អាចនឹងចេញសេចក្តីជូនដំណឹងដល់ប្រជាពលរដ្ឋ កុំឲ្យចេញទៅហាត់ប្រាណ នៅតាមសួនច្បារសាធារណៈទៀតផង ដោយសារតែកម្រិតឧស្ម័នពុលនៅមានច្រើន ហើយអាចប៉ះពាល់ដល់សុខភាពប្រជាជន ។
គួរជ្រាបថា បើតាមការវាស់ស្ទង់ពីកម្រិតគ្រោះថ្នាក់ នៅពេលនេះ ខ្យល់ពុលក្នុងទីក្រុងបាងកក មានសភាពអាក្រក់ជាងទីក្រុងមួយចំនួនក្នុងប្រទេសចិនទៅទៀត ក៏ប៉ុន្តែនៅគ្រាន់បើជាងទីក្រុងដេលីរបស់ប្រទេសឥណ្ឌា៕