រាជធានីភ្នំពេញ ៖ នៅម៉ោង០៧និង៣០នាទីយប់ ថ្ងៃទី២៦ ខែមករា ឆ្នាំ២០១៩ មានករណីចោរកម្មលួចចូលផ្ទះគាស់ទំលុះទំលាយយកសម្ភារៈមានតម្លៃ ព្រមទាំងប្រាក់ដុល្លាអាមេរិក មួយចំនួនធំ និងរថយន្តទំនើបម៉ាក លុចស៊ីស៥៧០ មួយគ្រឿង នៅចំណុចផ្ទះលេខ២៨ ផ្លូវD០១ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
បើតាមហ្វេសប៊ុកផេករបស់កងរាជអាវុធហត្ថរាជធានីភ្នំពេញ អោយដឹងថា ក្រោយពេលទទួលបានពាក្យបណ្តឹងរបស់ជនរងគ្រោះសមត្ថកិច្ចអាវុធហត្ថខណ្ឌសែនសុខ រួមជាមួយ ការិយាល័យបទល្មើស ព្រហ្មទណ្ឌកងរាជអាវុធហត្ថរាជធានីភ្នំពេញ អាវុធហត្ថខណ្ឌចំការមន និងអាវុធហត្ថខណ្ឌមានជ័យ បានសហការគ្នាបើកការ ស្រាវជ្រាវជាបន្តបន្ទាប់រហូតកំណត់មុខសញ្ញាបាន និងឃាត់ខ្លួន ជនសង្ស័យ០២នាក់ ឈ្មោះ អាត រដ្ឋា និងឈ្មោះ ពូន សុខគន្ធ ព្រមទាំងដកហូតរថយន្ត ០១គ្រឿង ម៉ាក Rav4 ក៏ប៉ុន្តែជនសង្ស័យមិនព្រមសារភាព និងសហការណ៍ផ្តល់ព័ត៌មាន ដល់សមត្ថកិច្ចឡើយ ។
ដោយវិធានការណ៍ជំនាញ នៅវេលាម៉ោង០២និង៣៥នាទីរំលងអធ្រាត ថ្ងៃទី២៨ ខែមករា ឆ្នាំ២០១៩ អាវុធហត្ថរាជធានីភ្នំពេញ បានស្រាវជ្រាវរហូតឈានដល់ធ្វើការកំណត់គោលដៅ និងរកឃើញរថយន្តមួយគ្រឿងទៀត ម៉ាក Luxis ៥៧០ ដែលជនសង្ស័យយកទៅលាក់ទុកក្នុងផ្ទះគ្មានលេខ ផ្លូវ៤៨BT ភូមិក្បាលទំនប់១ សង្កាត់ស្ទឹងមានជ័យ២ ខណ្ឌមានជ័យ ត្រលប់មកវិញប្រគល់ជូនជនរងគ្រោះ ។
វិធានការជំនាញបន្ត អាវុធហត្ថរាជធានីភ្នំពេញ បានស្រាវជ្រាវឃើញថា ឈ្មោះ អាត រដ្ឋា គឺជាជនដៃដល់ដែលបានចូលលួច ទ្រព្យសម្បត្តិ និងរថយន្តផ្ទាល់ ជាមួយដៃគូរម្នាក់ផ្សេងទៀត ឈ្មោះ សុខ វណ្ណា ។ ហើយឈ្មោះ អាត រដ្ឋា នេះ ធ្លាប់ជាប់គុក ០២ដងរួចមកហើយ ពាក់ព័ន្ធករណីលួចរថយន្តទំនើបៗ យ៉ាងសកម្មនៅតាមបុរី ត្រូវបានសមត្ថកិច្ចឃាត់ខ្លួនលើកទី១ នៅថ្ងៃទី១៨ ខែកក្កដា ឆ្នាំ២០១៣ ហើយត្រូវបានតុលាការបង្គាប់ឲ្យឃុំខ្លួននៅថ្ងៃទី១៩ ខែកក្កដា ឆ្នាំ២០១៣ និង ឃាត់ខ្លួនលើកទី២ នៅថ្ងៃទី១៦ ខែតុលា ឆ្នាំ២០១៧ ហើយត្រូវបានតុលាការបង្គាប់ឲ្យឃុំខ្លួន នៅថ្ងៃទី២០ ខែតុលា ឆ្នាំ២០១៧ ។ ក្នុងដើមឆ្នាំ២០១៩ នេះ ឈ្មោះ អាត រដ្ឋា ត្រូវបានអាវុធហត្ថរាជធានីភ្នំពេញ ឃាត់ខ្លួនបញ្ជូនទៅពន្ធនាគារជាលើកទី៣ រីឯដៃគូរឈ្មោះ សុខ វណ្ណា ដែលបានចូលរួមលួចជាមួយគ្នា កាលពីថ្ងៃទី២៦ ខែមករា ឆ្នាំ២០១៩ គឺទើបចេញពីគុកជាមួយគ្នាកាលពី ០៤ខែមុន បច្ចុប្បន្នបានគេចខ្លួនរួច។ រាល់ពេលសមត្ថកិច្ចឃាត់ខ្លួនម្តងៗ ឈ្មោះ អាត រដ្ឋា បានប្រើឈ្មោះផ្សេងៗគ្នា រួមមាន ឈ្មោះអាត រដ្ឋា ឬ គង់មាន ឬ រុំ រដ្ឋា ហៅមាន ឬប៉ូយ។
ឈ្មោះ អាត រដ្ឋា បានសារភាពបន្ថែមថា ក្នុងអំឡុងពេលជាប់ពន្ធនាគារ រូបគេជាមួយឈ្មោះ សុខ វណ្ណា តែងតែពិភាក្សាគ្នាអំពីវិធីសាស្ត្រក្នុងការលួច វិធីសាស្ត្រគេចពីសមត្ថកិច្ច វិធីសាស្ត្រឆ្លើយដោះបន្ទុកពេលសមត្ថកិច្ចចាប់បាន និងវិធីសាស្ត្រឆ្លើយសម្រាលទោសនៅចំពោះមុខតុលាការ ។
លុះពេលរូបគេនិងឈ្មោះ សុខ វណ្ណា ចេញពីពន្ធនាគារ ក៏ចាប់ដៃគ្នា អនុវត្តន៍ផែនការលួច និងវិធីសាស្ត្រទាំងឡាយដែលបានពិភាក្សាគ្នាក្នុងពន្ធនាគារ រហូតចុងក្រោយក៏ត្រូវអាវុធហត្ថរាជធានីភ្នំពេញឃាត់ខ្លួនជាលើកទី៣និងកសាងសំណុំរឿងបញ្ជូនទៅតុលាការ ក្នុងព្រឹកថ្ងៃទី៣០ ខែមករា ឆ្នាំ២០១៩ ដោយចោទពីបទលួចមានស្ថានទម្ងន់ទោសមិនរាងចាល ៕
