ក្រោយពីមានការភ្ញាក់ផ្អើល និងការខឹងសម្បារយ៉ាងខ្លាំង ពីសំណាក់ប្រជាជនខ្មែរស្ទើទូទាំងប្រទេស ទៅលើវេបសាយដ៏ធំមួយ ឈ្មោះអាម៉ាហ្សូន (Amazon.com) ដែលបានដាក់លក់គម្របចានបង្គន់ ក្រណាត់ជូតជើង ដោយបានដាក់រូបទង់ជាតិខ្មែរ និងប្រាសាទបុរាណខ្មែរ ដោយមានចេតនាបន្ទាបបន្ថោកជាតិសាសន៍ និងស្នាដៃបុព្វបុរសខ្មែរនោះ ក្រសួងពាក់ព័ន្ធក៏បានប្រតិកម្មតបវិញ កាលពីថ្ងៃទី១៧ ខែមករា ឆ្នាំ២០១៩ ដោយយោងតាមការស្រាវជ្រាវ និងរកឃើញថា នេះជាចេតនារបស់ក្រុមហ៊ុនមួយ ដែលមានទីតាំងនៅសហរដ្ឋអាមេរិក ។
សេចក្តីប្រកាសព័ត៌មាន ឯកឧត្តម ឯកអគ្គរាជទូត ជុំ សុន្ទរី បានថ្លែងទាំងការតក់ស្លុតថា “«រូបភាពនៃប្រាសាទអង្គរដោយរួមមាន អង្គរវត្ត តាព្រហ្ម បាយ័ន ឬបឹងមាលា ដែលត្រូវបានចុះបញ្ជីជាបេតិកភណ្ឌពិភពលោក តាំងពីឆ្នាំ១៩៩២ និងទទួលបានអត្ថប្រយោជន៍ពីអង្គការអភិរក្សអន្តរជាតិ (UNESCO) ចាប់តាំងពីឆ្នាំ២០១៧ ត្រូវបានប្រើប្រាស់ដោយក្រុមហ៊ុន ផលិតទំនិញមួយចំនួន ធ្វើជារូបភាពនៃផលិតផលដែលបង្កភាពអាម៉ាស់ ក្នុងនោះមាន គម្របបង្គន់ កំរាលបន្ទប់ទឹក កំរាលជើងមុខបង្គន់ វាំងននងូតទឹក និងកំរាលផ្ទះបាយ។ -លើសពីនេះទៅទៀត ក្រុមហ៊ុនផលិតបានប្រើប្រាស់វិធីគួរឲ្យស្អប់ខ្ពើម ដោយប្រើប្រាស់ទង់ជាតិ នៃព្រះរាជាណាចក្រកម្ពុជា សំរាប់ជាការរចនានៃកម្រាលបន្ទប់ទឹក (កំរាលព្រំ និងបង្គន់)។”
«ព្រះរាជាណាចក្រកម្ពុជា ថ្កោលទោសបណ្តាក្រុមហ៊ុនផលិត នៃផលិតផលទាំងអស់នេះ និងទាមទារឲ្យក្រុមហ៊ុន Amazon បញ្ឈប់ជាបន្ទាន់នូវការលក់របស់ខ្លួន ដោយដកចេញពីគេហទំព័រនូវផលិតផលទាំងនេះ ដែលប៉ះពាល់យ៉ាងធ្ងន់ធ្ងរដល់កិត្តិយសជាតិ និងកិត្យានុភាព នៃព្រះរាជាណាចក្រកម្ពុជា។ ស្ថានទូតបានធ្វើការតវ៉ា និងការទាមទារខាងលើ ជាមួយសេវាកម្មអតិថិជនរបស់ក្រុមហ៊ុន Amazon កាលពីថ្ងៃទី១៦ ខែមករា ឆ្នាំ២០១៩»។
ទោះជាយ៉ាងណាក្តី ករណីនេះ ឯកឧត្តមអគ្គនាយកនៃអាជ្ញាធរជាតិអប្សរា លោកក៏បានធ្វើការផ្ញើលិខិតទៅកាន់ក្រុមហ៊ុន Amazon ដោយតវ៉ាចំពោះការលក់ផលិតផលទាំងនេះ នៅលើគេហទំព័ររបស់ក្រុមហ៊ុន ហើយបានសង្កត់ធ្ងន់ផងដែរថា “វាមិនមែនជាការចាំបាច់ទេ ក្នុងការទទូចលើចរិកលក្ខណៈថោកទាប នៃការប្រើប្រាស់នេះ ហើយការផ្សព្វផ្សាយផលិតផល ដែលបង្កភាពអាម៉ាសទាំងនេះ ត្រូវតែបញ្ឈប់ជាបន្ទាន់” ជាដាច់ខាត ៕
