បន្ទាយមានជ័យ៖ យើងដឹងហើយថា សេដ្ឋកិច្ចប្រទេសកម្ពុជាពឹងផ្អែកទៅលើវិស័យកសិកម្មខ្លាំង ដោយប្រជាជនប្រមាណ ៨០% ទៅ ៨៥% ជាកសិករ ហើយ កសិកម្ម ផ្ដល់ ៥០% នៃផលិតផលជាតិសរុប។ ផលិតផលកសិកម្ម រួមមានដំណាំរួមផ្សំ ៦៣% ការចិញ្ចឹមសត្វ ២៤% ការនេសាទ ១០% និងព្រៃឈើ ៣%។
យ៉ាងណាមិញ ទន្ទឹមនឹងនេះជារឿយៗក៏មានកសិករជាច្រើនបានត្អូញត្អែអំពីតម្លៃកសិផលរបស់ខ្លួន ដែលមានតម្លៃថោក បើធៀបទៅនឹងខ្ទង់ចំណាយ គឺអស់ច្រើន ដូចជាត្រូវប្រើប្រាស់ជី ថ្នាំ ជាដើម ជាក់ស្ដែងថ្មីៗនេះ ប្រជាកសិករជាច្រើនគ្រួសារនៅស្រុកមង្គលបូរី ខេត្តបន្ទាយមានជ័យ ត្អូញត្អែរអំពីតម្លៃស្រូវចុះថោកហើយលក់មិនបាន ប្រាក់កម្រៃសម្រាប់ដោះស្រាយជីវភាពគ្រួសារ។
តាមសម្ដីកសិករនៅទីនោះបានឲ្យដឹងថា សព្វថ្ងៃនេះ សូម្បីតែស្រូវសែនក្រអូប ដែលជាប្រភេទស្រូវមានតម្លៃ ក៏ចុះថោកមកនៅត្រឹមតែជាង ៦០០ រៀលក្នុងមួយគីឡូក្រាមប៉ុណ្ណោះ ហើយប្រសិនបើស្រូវនេះសុទ្ធល្អ ស្អាតឥតខ្ចោះ ឈ្មួញហ៊ានទិញក្នុងតម្លៃ ជាង១ពាន់រៀល ក្នុងមួយគីឡូក្រាម ដែលតម្លៃប៉ុននេះ មិនអាចរួចដើម នៃការចំណាយ ដែលមួយហិកតារ ត្រូវចំណាយយ៉ាងហោចណាស់ក៏ ៦០០ដុល្លារដែរ ។
ប្រជាពលរដ្ឋបានអះអាងថា បច្ចុប្បន្ននេះ តម្លៃទិន្នផលស្រូវរបស់ពួកគាត់ថោកខ្លាំងជាងឆ្នាំមុនៗ ខណៈដែលការចំណាយច្រើន និងប្រើកម្លាំងក៏ច្រើនដែរ ។
ផ្ទុយពីប្រជាពលរដ្ឋលើកឡើងខាងលើ លោក រ័ត្ន ដាស៊ីណាង អភិបាលស្រុក មង្គលបូរី បាននិយាយថា តាមពិតតម្លៃស្រូវពុំបានចុះថោកឡើយ ដែលហេតុស្រូវធ្លាក់ចុះដល់តម្លៃ ៦០០រៀល ទៅ ៧០០ក្នុងមួយគីឡូក្រាម ដោយសារតែប្រជាកសិករធ្វើស្រូវមិនបានផលល្អ ជាក់ស្ដែងពេលដែលស្រូវចេញផ្កា ប្រជាពលរដ្ឋខ្វះទឹកចាក់បំពេញស្រែ ទើបស្រូវទំចេញគ្រាប់មិនល្អ ហើយបើស្រូវល្អ នោះក៏នឹងបានតម្លៃថ្លៃគួរសមដែរ ។
លោក អភិបាលស្រុករូបនេះបានបន្ថែម ទៀតថា ទោះជាបច្ចុប្បន្នថ្វីបើប្រជាពលរដ្ឋលក់ស្រូវមិនបានថ្លៃដូចឆ្នាំមុនៗយ៉ាងណាក្ដី ក៏ប្រជាពលរដ្ឋមិនមានជីវភាពលំបាកលំបិនដែរ ព្រោះព្រោះកសិករបានប្រមូលផលស្រូវលើកទីមួយរួចម្ដងហើយ ទទួលបានទិន្នផលល្អ ដូច្នេះពួកគាត់អាចយកប្រាក់ចំណេញពីលើកទីមួយមកទូទាត់គ្នាបាន គ្រាន់តែមិនបានប្រាក់ចំណេញច្រើនតែប៉ុណ្ណោះ ។
ទោះជាយ៉ាងណាកសិករមួយចំនួនអះអាងថា ការប្រមូលផលស្រូវទាំង២លើក ក៏ពួកគាត់លក់ស្រូវសងធនាគារមិនគ្រប់ដែរ ព្រោះបានខ្ចីប្រាក់ពីធនាគារធ្វើដើមទុនដោយមានអត្រាការប្រាក់ ខណៈដែលពួកគាត់មានតែរបបធ្វើស្រែតែមួយមុខ ដូច្នេះមិនអាចរកប្រាក់ដោះស្រាយជីវភាពគ្រួសារបានទេ ៕