រាជធានីភ្នំពេញ ៖ ពាក់ព័ន្ធករណីជនសង្ស័យធ្វើសកម្មភាពភ្ជង់ប្លន់យកទ្រព្យពីនារីស្រស់ស្អាតលក់អីវ៉ាន់អនឡាញម្នាក់អស់ប្រមាណ៣,០០០ដុល្លារ នៅផ្ទះសំណាក់បៃតង កាលពីដើមខែមករា ២០១៩ ពេលនេះត្រូវបានកម្លាំងសមត្ថកិច្ចកងអាវុធហត្ថរាជធានីភ្នំពេញ បានធ្វើការស្រាវជ្រាវ និងចាប់ខ្លួនបានហើយ ។
តាមរយៈផេកផ្លូវការរបស់កងរាជអាវុធហត្ថរាជធានីភ្នំពេញ អោយដឹងថា នៅយប់ថ្ងៃទី១១ ខែមករា ឆ្នាំ២០១៩ សមត្ថកិច្ចអាវុធហត្ថមូលដ្ឋានខណ្ឌពោធិ៍សែនជ័យ សហការណ៍ជាមួយ កម្លាំងជំនាញនៃការិយាល័យ បទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ ធ្វើការស្រាវជ្រាវ និងឃាត់ខ្លួនជនសង្ស័យបាន នៅចំណុចផ្ទះសំណាក់សូរិយា ក្បែរសាលាខណ្ឌពោធិសែនជ័យ ។
នៅចំពោះមុខ សមត្ថកិច្ចកងរាជអាវុធហត្ថរាជធានីភ្នំពេញ ជនសង្ស័យព្រមសារភាព និងទទួលកំហុសថា រូបគេមានឈ្មោះ ឌីណា ពុទ្ធិស័ក្ត ហៅ ទី ពិតជាបានប្រើ Account Facebook ឈ្មោះ Tii Fee(ឥទ្ធិពលនៃផ្សែងគីមី) បោកនារីរងគ្រោះតាមរយៈ Facebook ឲ្យមកជួបនៅផ្ទះសំណាក់ និងភ្ជង់ប្លន់កាលពីថ្ងៃទី០១ ខែមករា ឆ្នាំ២០១៩ ពិតប្រាកដមែន ហើយសម្ភារៈដែលយកបានពីនារីរងគ្រោះ រូបគេបានប្រគល់ឲ្យមិត្តភក្តិឈ្មោះ ត្រា, ឈ្មោះឧត្តម, ឈ្មោះស្នា និង ឈ្មោះជា ទៅដូរយកគ្រឿងញៀន មួយកញ្ចប់ធំ មកចែកគ្នាជក់និងលក់បន្ត។
សូមរម្លឹកថា នៅវេលាម៉ោង៦ល្ងាច ថ្ងៃទី១ ខែមករា ឆ្នាំ២០១៩ តាមបណ្តោយផ្លូវបេតុង ក្នុង ផ្ទះសំណាក់បៃតង ស្ថិតនៅភូមិអ័រគីដេ សង្កាត់អូបែកក្អម ខណ្ឌសែនសុខ រាជធានីភ្នំពេញ នារីស្រស់ស្អាតម្នាក់ស្គាល់ជនសង្ស័យម្នាក់ តាមហ្វេសប៊ុកឆាតចុះឆាតឡើងលួងលោមជនរងគ្រោះ រហូតឈានដល់ណាត់ជួបគ្នានៅផ្ទះសំណាក់បៃតង ស្រាប់តែនារីរងគ្រោះមកដល់បើកទ្វារចូលស្រាប់តែជនសង្ស័យច្របាច់ក យកកាំបិតភ្ជង់ប្លន់យកគ្រឿងអលង្ការនិងទូរស័ព្ទ សរុបជាទឹកប្រាក់អស់ជាង៣ពាន់ដុល្លារ រួចគេចខ្លួនបាត់ស្រមោល ។
សម្ភារដែលត្រូវបាត់បង់រួមមាន ៖ ទូរស័ព្ទ iPhone XS Max ០១គ្រឿង, ខ្សែកចំនួន០១ខ្សែ, ខ្សែដៃចំនួន០១ខ្សែ, ជញ្ជៀនពេជ្រ០១វង់ និងលុយដុល្លារចំនួន២០០ដុល្លារ សរុបជាទឹកប្រាក់អស់ជាង៣ពាន់ដុល្លារ ។
បច្ចុប្បន្នអាវុធហត្ថរាជធានីភ្នំពេញ កំពុងបន្តនិតិវិធី ស្រាវជ្រាវស្វែងរកចាប់ខ្លួនគូរកន របស់ជនសង្ស័យដែលនៅសេសសល់ជាបន្តទៀត ៕
